Vendimi i Gjykatës Kushtetuese i lejoi Erion Veliajt të vijojë detyrën si kryebashkiak i Tiranës.
Gazetari Armand Shkullaku duke folur në emisionin “Opinion” e cilësoi vendimin profesionalisht të drejtë, por theksoi se ai mungon në integritet.
Sipas tij, gjyqtarët që votuan kundër shkarkimit të Veliajt kanë mbajtur në çdo rast qëndrim në favor të kryeministrit Edi Rama.
“Në pamje të parë duket sikur gjykata ka marrë një vendim që bie ndesh me Ramën. Rama kërkoi shkarkimin e Veliajt, por gjykata ia la përsëri në krye të bashkisë. Po të shohësh pesë gjyqtarët që votuan kundër shkarkimit, janë të njëjtët që në çdo rast kanë votuar pro Ramës. Ky është rasti i parë që këta gjyqtarë marrin një vendim ‘kundër’ tij,” u shpreh Shkullaku.
Ai shtoi se vendimi mund të ketë ardhur në një moment kur Rama është treguar indiferent për zhvillimin e zgjedhjeve të reja në Tiranë, për shkak të situatës politike dhe sondazheve jo të favorshme.
“Rama sot nuk është në të njëjtën pozitë si para një muaji, kur dekretoi zgjedhjet. Tani Balluku, drejtuesja e fushatës për Tiranën, është e pandehur, ndërsa sondazhet nuk janë aq pozitive. Në rastin më të mirë Rama ka qenë indiferent, në rastin më të keq i ka interesuar që zgjedhjet të mos zhvillohen,” theksoi ai.
Sipas Shkullakut, vendimi i Gjykatës Kushtetuese “është profesionalisht i drejtë, por jo për t’u duartrokitur, sepse nuk i jep integritet institucionit”. Ai kujtoi se disa prej gjyqtarëve kishin votuar më herët për shkurtimin e mandateve të kolegëve të tyre në mënyrë të paligjshme.
Në përfundim, Shkullaku nënvizoi se tani mbetet për t’u parë reagimi i kryebashkiakut.
“Do të shohim nëse Veliaj nesër do bëjë si herën e parë, kur Rama ia rrëzoi vendimin për 24 minuta – nëse do emërojë për kryetar bashkie atë që do vetë, apo atë që do Rama,” tha ai.
