Këshilli Politik nuk arriti dakordësinë lidhur me ndryshimet Kushtetuese, ndërsa demokratët hodhën në tryezë propozimin për hapjen e listave 100 %, por me kushtin që formula e koalicioneve të mos ndryshojë.
Takimi i sotëm zgjati rreth 2 orë e 30 minuta, por konsensusi duket ende larg. Kjo për faktin se mazhoranca e drejtuar nga Kryeministri Edi Rama shprehet se diskutimet mbi atë se sa duhen hapur listat duhet të bëhen pas 30 korrikut, ditë kur Kuvendi do të votojë draftin mbi ndryshimet Kushtetuese.
Në anën tjetër opozita kërkon që listat të hapen 100 % dhe jo sikundër parashikohet në draftin e paraqitur në Kuvend nga opozita parlamentare dhe Edi Rama për hapjen e listave në jo më pak se 2/3.
Për opozitën e gjithë kjo lojë e Edi Ramës synon të ndalojë koalicionet para-zgjedhore, ndërsa Kryeministri në një reagim të tij shprehet se koalicionet nuk do të ndalohen, por do të aplikohet një formulë e re, e ngjashme me atë të vendeve të Europës Perëndimore.
Nuk dihet nëse mazhoranca do t´i shkojë deri në fund idesë për të miratuar ndryshimet Kushtetuese në 30 korrik dhe sesa mund të ndikojë kjo në vijimin e diskutimeve në Këshillin Politik lidhur me masën e hapjes së listave, pra nga 75 në 100 %, apo në modelin e koalicioneve që mund të aplikohen.
Opozita e Bashkuar, por edhe Presidenti Ilir Meta, janë deklaruar kundër ndryshimeve të njëanshme Kushtetuese.
Madje, Kreu i Shtetit ka paralajmëruar se jeta vazhdon edhe pas 30 korrikut, por mund të rrezikohen tryezat dhe diskutimet, nëse realizohen në mënyrë të njëanshme ndryshimet Kushtetuese.
