Partia Socialiste duket i ka dhënë fund lojrave politike përsa i takon marrëveshjes së arritur në Këshillin Politik mbi reformën zgjedhore.
Komisioni Parlamentar i Ligjeve do të shqyrtojë më 15 korrik draftin, ndërkohë që në seancën e 23 korrikut ajo do të kalojë për miratim në seancë parlamentare.
PS ka deklaruar përmes Kryeministrit Edi Rama dhe Kreut të Grupit Parlamentar, Taulant Balla, se ata kanë vetëm 74 vota, nga minimalisht 84 që duhen për miratimin e ndryshimeve në ligj.
E ndërsa deri më sot, Rama deklaronte për negociata të reja me atë që e konsideronte “opozita parlamentare” me synim gjetjen e një marrëveshjeje, duket se gjërat ndryshuan pas takimit mes Ballës dhe ambasadores amerikane, Yuri Kim.
Takimi duket se ka dhënë fryte, teksa socialistët janë detyruar që të paktën të kalojnë në procedura parlamentare draftin e dakordësuar.
Gjatë një mbledhjeje të Grupit Parlamentar socialist, Balla mësohet të jetë shprehur se PS i qëndron marrëveshjes me opozitën, duke njoftuar kalimin e saj për votim më 23 korrik, pasi më parë do të diskutohet në Komisionin e Ligjeve.
Gjithashtu Balla u ka drejtuar një apel deputetëve të asaj që quhet si opozita parlamentare që të miratojnë draftin, dhe më pas të nisë diskutimi mbi listat e hapura, kërkesë kjo e paraqitur nga deputetët që morën mandatet pas dorëzimit të tyre nga të mandatuarit e PD dhe LSI.
Tashmë e vetmja lojë që mund të ndodhë në seancën e 23 korrikut është që grupi parlamentar socialist të votojë në unison pro marrëveshjes për zgjedhoren, por nëse votat e opozitës parlamentare do të jenë kundra apo abstenim, atëherë ndryshimet në Kod s´mund të realizohen.
Por në sytë e opinionit publik dhe ndërkombëtarëve përgjegjësia sërisht do të binte mbi PS, e cila kur ka dashur, ka arritur të sigurojë jo 84, por 108 vota.
