Nga Boldnews.al
Një investigim i “Boldnews.al” (BN) ka nxitur Prokurorinë e Përgjithshme për të nisur verifikime mbi oficerin e Policisë Gjyqësore Erin Çaku, njëkohësisht bashkëshort i ish-Prokurores së Përgjithshme, Arta Marku, pas dyshimeve se është paguar miliona lekë pa kryer asnjë punë në Prokurorinë e Shkodrës, gjatë periudhës Janar-Korrik 2019.
Një raport i brendshëm statistikor i Prokurorisë së Shkodrës, i siguruar në mënyrë zyrtare nga redaksia, dëshmoi se z. Çaku, i cili në 6-mujorin e parë të vitit të kaluar ka ushtruar funksionet në Prokurorinë e Shkodrës, rezultoi se nuk kishte ndjekur asnjë procedim penal.
Ky fakt ishte në kontrast me aktivitetin e kolegëve të tij në prokurorinë e rrethit verior, të cilët, gjatë të njëjtës periudhë, kishin ndjekur mesatarisht rreth 30 procedime penale.
Pas publikimit të të dhënave nga “Boldnews.al” (BN), Prokuroria e Përgjithshme konfirmon se ka nisur verifikimin e rastit.
“Sektori i Monitorimit pranë Prokurorisë së Përgjithshme është angazhuar për verifikimin e të gjithë fakteve, objekt investigimi i agjencisë tuaj”, thuhet në një shkresë të nënshkruar nga Drejtori i Koordinimit Institucional në institucionin qendror të Akuzës, Sokol Stojani.
Nëse rast se konfirmohen dyshimet për abuzim me detyrën nga z. Çaku, ato mund të shndërrojnë në objekt verifikimi edhe ish-drejtuesin e Prokurorisë së Shkodrës në atë kohë, Ylli Pjetërnikaj, si edhe Arta Markun, e cila, në cilësinë e Prokurores së Përgjithshme (të Përkohshme), ishte autoriteti përgjegjës për kontrollin e veprimtarisë së Oficerëve të Policisë Gjyqësore.
Prokuroria e Përgjithshme nuk dha një përgjigje të drejtëpërdrejtë lidhur me pyetjet mbi përgjegjësi të mundshme të Markut dhe Pjetërnikaj, duke deklaruar se “nëse do të rezultojnë shkelje në përfundim të këtij verifikimi, do të ndiqen të gjithë hapat ligjor për adresimin e përgjegjësive individuale”.
Skandal financiar?
Oficeri i Policisë Gjyqësore, Erin Çaku, ushtronte funksionin si i komanduar në Prokurorinë e Lezhës, në fund të viti 2017, kur bashkëshortja e tij, Arta Marku, u përzgjodh të ushtronte detyrën e Prokurores së Përgjithshme (të Përkohshme), nëpërmjet një procedure kontraverse parlamentare.
Pas përfundimit të periudhës së komandimit, në fillim të vitit 2018, Çaku rikthehet në Prokurorinë e Shkodër, strukturë në të cilën kishte emërimin.
Në Maj 2018, Arta Marku, cakton në drejtimin e Prokurorisë së Shkodrës prokurorin Ylli Pjetërnikaj, një lëvizje në kundërshtim me ligjin, pasi ai nuk plotësonte kriteret formale ligjore.
Megjithatë, Pjetërnikaj qëndroi në krye të Prokurorisë së Shkodrës deri në Korrik 2019, kur Këshilli i Lartë i Prokurorisë, i cili ishte krijuar vetëm pak muaj më parë, vendosi t’i ndërpriste komandimin.
Gjatë periudhës nga Janari i vitit 2019 e deri në Korrik, kur Pjetërnikaj u largua nga drejtimi i Prokurorisë së Shkodrës, rezulton se oficeri i Policisë Gjyqësore, Erin Çaku, ka zero të gjithë treguesit statistikorë.
E, megjithatë, z. Çaku rezulton se është paguar rregullisht gjatë asaj periudhe.
Prokuroria e Shkodrës, në një komunikim zyrtar me “Boldnews.al” pak ditë më parë, konfirmoi se “gjatë vitit 2019, oficeri Erin Çaku është paguar për punën e bërë dhe masa e pagesës dhe ditët e punës janë verifikuar dhe evidentuar nga Drejtuesi i Prokurorisë në atë kohë (Ylli Pjetërnikaj, shën. Red) dhe Zyra e Financës…”.
Ndërsa, lidhur me shifrën zero në të gjithë të dhënat statistikore për ngarkesën në punë, Prokuroria e Shkodrës dha një përgjigje jo fort bindëse.
“Gjatë vitit 2019, ky oficer ka kryer veprime hetimore dhe proceduriale dhe fakti që rezulton pa një numër konkret procedimesh penale, lidhet me shumë arsye, edhe me faktin që është komanduar në një prokurori tjetër dhe se procedimet e tij i kanë kaluar me vendim zëvendësimi oficerëve të tjerë…dhe për këtë shkak nuk rezultojnë në ngarkesën e këtij oficeri”, tha Prokuroria e Shkodrës në një komunikim me redaksinë, në fillim të Qershorit 2020.
Prokuroria e Shkodrës citon, në shkresën e saj, edhe një detaj që lidhet me komandimin e oficerit Erin Çaku në një Prokurori tjetër.
Lëvizja e tij ka krijuar edhe më herët dyshime për një vendimmarrje në kushtet e konfliktit të interesit.
Në Korrik 2019, në të njëjtën kohë që Ylli Pjetërnikaj largohet nga drejtimi i Prokurorisë së Shkodrës, oficeri i Policisë Gjyqësore, Erin Çaku, komandohet në Prokurorinë e Durrësit.
Komandimi i tij nga Shkodra në Durrës u realizua në një kohë që bashkëshortja e tij, Arta Marku, ishte autoriteti përgjegjës për këto vendimmarrje.
“Boldnews.al” e ka raportuar më herët për komandimin e Çakut nën dyshimet për konflikt interesi.
Por, burime zyrtare nga Prokuroria e Përgjithshme deklaruan në atë kohë se lëvizja e Çakut ishte bërë pas kërkesave të Prokurorisë së Durrësit për shtimin e kapaciteteve në ndihmë të hetimit.
Megjithatë, ky argumentim nuk eleminoi aspak dyshimet mbi konflikt interesi ndërmjet bashkëshortëve Marku-Çaku.
Sidomos për faktin se, në një mori oficerësh që ushtrojnë detyrën në seksionet e Prokurorisë, u identifikua pikërisht bashkëshorti i Prokurores së Përgjithshme (të Përkohshme), për t’u afruar pranë Tiranës, qytet në të cilin familja kishte marrë një banesë me qera të paguar nga Këshilli i Ministrave.
Në Nëntor 2019, vetëm pak ditë para se Arta Marku të largohej nga drejtimi i Prokurorisë së Përgjithshme, bashkëshorti i saj, Erin Çaku, merr emërimin përfundimtar në Prokurorinë e Durrësit.
