KPA konfirmon shkarkimin e prokurorit të Tiranës, Shpëtim Kurti

Prokurori Shpëtim Kurti (djathtas) dhe avokati i tij gjatë seancës dëgjimore në KPK

Kolegji i Posaçëm i Apelimit njoftoi të mërkurën lënien në fuqi të vendimit të Komisionit të Pavarur të Kualifikimit, KPK për shkarkimin nga detyra të prokurorit Shpëtim Kurti.

Në njoftimin e KPA thuhet se vendimi është marrë po të mërkurën në dhomë këshillimi, prej trupës gjykuese të përbërë nga Rezarta Schuetz kryesuese, Sokol Çomo relator dhe Albana Shtylla, Ina Rama e Natasha Mulaj anëtarë.

Më 23 nëntor 2018, KPK vendosi shkarkimin nga detyra të prokurorit të Prokurorisë së Tiranës, Shpëtim Kurti, për probleme me pasurinë dhe kontakte të papërshtatshme. Kurti e ankimoi vendimin e KPK si të padrejtë. Fillimisht Komisioni i mbylli hetimet vetëm për kriterin e pasurisë, por pas kërkesës së tij u verifikuan edhe dy kriteret e tjerë, pastërtia e figurës dhe profesionalizmi.

LEXO EDHE  “Na u premtua falja e taksës së bashkisë”, Transporti ndërqytetas: Në krye të 10 ditëve, marrim masa nëse s'na jepet zgjidhje

Trupa gjykuese e KPK e përbërë nga Brunilda Bekteshi kryesuese, Lulzim Hamitaj relator dhe Roland Ilia anëtarë konstatuan se, kur kishte qenë në detyrën e prokurorit, Kurti kishte pasur kontakte me një person që kishte qenë i proceduar për trafikim të qenieve njerëzore. Gjithashtu, KPK konkludoi se ai kishte kryer deklarim të pamjaftueshëm për pasurinë. Kurti kundërshtoi gjetjet e KPK-së për pasurinë dhe i cilësoi “irreale dhe të pasakta” konkluzionet e DSIK-së rreth figurës së tij. Ai kërkoi të konfirmohej në detyrë.