Nga BoldNews.al
Disa aplikantë, të cilët vlerësonin se përmbushnin kriterin e “juristit të zotë” dhe të gatshëm për të dhënë ndihmën e tyre për uljen e stokut të dosjeve në Gjykatën e Lartë, u skualifikuan nga Këshilli i Lartë Gjyqësor dhe USAID, me argumentin se janë “të mbikualifikuar”.
Situata paradoksale vendos në një pozitë jo shumë komode edhe ambasadoren amerikane në Tiranë, Yuri Kim, e cila, në Prill të këtij viti, deklaroi se “sipas Marrëveshjes mes KLGJ e USAID, do të punësohen një trupë juristësh të zotë për të ndihmuar Gjykatën e Lartë që të veprojë me më shumë efikasitet”.
Por, përtej pritshmërive të krijuara pas deklarimeve të ambasadores Kim, KLGJ dhe USAID duket se nuk janë të prirur për të siguruar “juristë të zotë”.
Procesi i rekrutimit duket se po përmbush dyshimet e ngritura më herët nga ‘Boldnews.al” se “trupa e juristëve të zotë”, në fakt nuk është më shumë se sa një grup “ndihmësish administrativë”.
Procesi i rekrutimit
Këshilli i Lartë Gjyqësor ka publikuar në faqen e tij të internetit ka shpjeguar të gjithë hapat e ndërmarrë për të rekrutuar këtë grup “sekretarësh”.
Në një njoftim tejet të detajuar, por aspak të nevojshëm për nga rëndësia, KLGJ dhe USAID deklarojnë se kanë marrë rreth 400 aplikime me e-mail për 10 vende vakante, pas thirrjes për “juristë të zotë”.
Më pas, njoftimi i përbashkët KLGJ-USAID, tregon në mënyrë kronologjike se si janë kryer skualifikimet e aplikimeve, deri sa kanë arritur në numrin final 32 kandidatura të përshtatshme, të cilët do i nënshtrohen testimit me shkrim.
“Overqualified”
Në procesin e skualifikimit të aplikimeve konstatohet një situatë paradoksale. KLGJ dhe USAID deklarojnë se kanë skualifikuar 6 aplikime, për shkak se ishin të “mbikualifikuar”.
“Mbështetur në thirrjen për aplikime, përshkrimin e punës të NUNÇP-ve dhe detyrave dhe përgjegjësive të pritshme, kandidatët e vlerësuar si të nënkualifikuar (më pak se 2 vite përvojë pune) dhe kandidatët e vlerësuar si të mbikualifikuar (6 ose më shumë vite përvojë pune) nuk u përzgjodhën për listën e shkurtër”, thuhet në njoftimin e përbashkët KLGJ/USAID.
Një histori e “tjerrur” keq
Në një moment kur sistemi i drejtësisë është në gjendjen e tij më të vështirë, përfshirë bllokimin e Gjykatës Kushtetuese dhe Gjykatës së Lartë, historia e “sekretarëve të përkohshëm” që do të ndihmojnë për uljen e stokut të 35 mijë dosjeve është një ndër gjërat më të parëndësishme.
Megjithatë, kjo situatë mund të përfshihet në radhën e absurditeve që po aplikohen prej kohësh në sistemin e drejtësisë në Shqipëri.
Mbrëmjen e 29 Prillit 2020, në një kohë kur shqiptarët vijonin të ishin të izoluar për shkak të masave anti-Covid 19, ambasadorja Yuri Kim shpalli Marrëveshjen mes KLGJ dhe USAID, ku njoftonte për procesin e rekrutimit të “avokatëve të zotë” që do të ndihmojnë në uljen e stokut të dosjeve në Gjykatën e Lartë.
Termi “avokatë të zotë”, i përdorur nga Yuri Kim mori menjëherë nota pikëpyetjeje, pasi dukej absurde që avokatët të kishin akses në dosjet e gjykatës.
Brenda pak orëve, ambasada, në një status zyrtar në rrjetet sociale, e modifikoi termin “avokatë të zotë” në “juristë të zotë”.
Por, dyshimi se KLGJ-USAID do të rekrutonin avokatë për stokun e dosjeve në Gjykatën e Lartë mbeti gjithësesi.
Pikërisht, ky dyshim duket se ka nxitur përzgjedhësit e aplikimeve që të shmangin sa më shumë rekrutimin e avokatëve. Por, sërish, për përzgjedhjen e aplikimeve nuk u gjet zgjidhja më e mirë.
KLGJ-USAID kanë përzgjedhur aplikantët që kanë licensë avokatie, por që nuk kanë më shumë se 6 vite përvojë pune.
Pra, aplikantët janë avokatë, por me pak vite përvojë. Në fund të fundit, sërish mbeten avokatë.
