Interi barazoi me rezultatin 3-3 mbrëmjen e djeshme kundër Sassuolos, në një ndeshje që mori një rrjedhë të çuditshme në minutat e fundit.
Për Interin lajm i keq nuk ishin vetëm dy pikët e lëna në fushën e lojës, por zikaltërit sot janë njohur me vendimet e komisionit të disiplinës në FIGC, që ka vendosur të pezullojë një ndeshje trajnerin Antonio Conte, shkak kanë qenë kartonët e verdhë.
Tekniku nuk do të jetë në stol kundër skuadrës së Parmës, kurse më rëndë e ka pësuar Milan Skriniar. Sllovaku i Interit u ndëshkua me karton të kuq në fund të ndeshjes dhe nuk i përmbajti nervat.
Ofendimet ndaj arbitrit ishin shkruar të gjitha në protokoll dhe ai është dënuar me tre ndeshje. Veç ndeshjes në transfertë kundër Parma, Skriniar nuk do të mund të luajë edhe në sfidat kundër Brescia e Bologna.
