Aleanca për Mbrojtjen e Teatrit ka kallzuar penalisht në SPAK, ministrin e Brendshëm, Sandër Lleshaj, Drejtorin e Përgjithshëm të Policisë, Ardi Veliu dhe Kryebashkiakun e Tiranës, Erion Veliaj.
Sipas AMT, të tre zyrtarët akuzohen për vrasje të mbetur në tentativë.
“Kemi kërkuar arrestimin e 3 personave të lartpërmendur, për shkak të funksioneve që kanë dhe mund të manipulojnë provat.
Jemi besimplotë që SPAK do të hetojë lidhur me kallzimin penal të depozituar”, tha Adriana Kalaja, përfaqësuese e Aleancës.
Sipas saj, provat në SPAK nuk janë depozituar pikërisht nga frika se mund të manipulohen ose shkatërrohen.
Në kallzimin penal të depozituar përshkruhen momentet se si është sulmuar godina e Teatrit Kombëtar në natën e 17 majit dhe shembja e saj në momentet që në ambientet e brendshme ka pasur ende qytetarë.
Gjithashtu përshkruhen momentet e dhunës ndaj qytetarëve nga forcat speciale të policisë.
“Provat do të dorëzohen në momentin që do të na thërrasë SPAK për të na marrë dvshmitë”, thanë përfaqësues të Aleancës për Mbrojtjen e Teatrit.
Ndërkohë Robert Budina tha se e gjithë dosja e Teatrit do të përkthehet dhe do të depozitohet në institucionet ndërkombëtare, duke i kërkuar edhe hetimin e çështjes.
Budina tha se në 17 maj, teatri u sulmua me forcat RENEA, që ishin të armatosura.
“SPAK të marrë masa, pasi dyshojmë se provat mund të manipulohen dhe kjo ka ndodhur më parë me institucionet e drejtësisë në Shqipëri, manipulimin e provave apo shkatërrimin e tyre”, thanë përfaqësues të AMT.
Kjo është padia e 3-të që AMT ka depozituar në SPAK lidhur me shembjen e Teatrit, një për nënkryetarin e Bashkisë, Arbion Mazniku, një për Kryebashkiakun Erion Veliaj dhe tani për Lleshajn, Veliun dhe Veliajn.
Dy procedimet e para penale janë regjistruar nga SPAK, ndërsa janë sekuestruar dokumentacionet lidhur me vendimet për shembjen e Teatrit dhe projektin për Teatrin e ri Kombëtar.
DENONCO