Qershori dhe korriku do të jenë muaj ku në të gjitha zonat e dëmtuara nga tërmeti do të ketë hapje kantieresh serioze të rindërtimit qoftë me shtëpitë, shkollat, pastaj edhe me proceset e tjera me grantet.
Kjo u bë e ditur nga ministri i Shtetit për Rindërtimin, Arben Ahmetaj, gjatë prezantimit nga dy arkitektët e famshëm italianë Stefano Boeri dhe Mario Cucinella, në Këshillin Kombëtar të Territorit, të dy planeve të rindërtimit në Tiranë dhe Durrës.
“Në terren ka filluar puna me pastrimin e territoreve dhe bërjen gati të një sërë numri trojesh, të cilat do të vihen në shërbim të këtyre projekteve për rindërtimin.Këtë të premte Fondi Shqiptar i Zhvillimit mbyll fazën e parë të prokurimit për 2 400 shtëpi, ditët më vonë do të jetë edhe bashkia e Tiranës, ndërkohë që FSHZH është në procesin përfundimtar, fazën e dytë të prokurimit të një numri të konsiderueshëm shkollash në zonën e dëmtuar përtej të Tiranës.
Procesi sa i përket objekteve arsimore në bashkinë e Tiranës është në përfundim të projekteve dhe në fillim të procesit të fazës së parë të prokurimit të huasë.Kemi punuar me donatorët, Komisioni Europian ka avancuar me pjesën e vet me 15 milionë euro për 22 shkolla nëpërmjet UNDP, e cila sot që flasim janë në proces të avancuar prokurimi procedurë e shpejtë e bërë nga ana e tyre në bashkëpunim për sa i përket prioriteteve dhe konkretisht shkollave dhe zonave gjeografike ku shkollat janë vendosur të bashkërenduara me komisionin shtetëror të rindërtimi”, tha Ahmetaj.
Ndërsa, Kryeministri Edi Rama deklaroi se me këto projekte hapet një kapitull i ri.
“Jo thjesht garantojmë strehim për ata që presin të futen në shtëpitë e tyre, por krijojmë shembuj të rinj të Shqipërisë që duam për gjeneratën që duam, të qyteteve të gjeneratës tjetër, patjetër edhe të organizimit dhe bashkëjetesës komunitare të gjeneratës tjetër.Këto dy lagje të reja, njëra pranë lumit të Tiranës e tjetra në zonën e Spitallës, mishërojnë ambicien tonë për Shqipërinë që duam”, tha Rama.
