Ministri i Brendshëm, Sandër Lleshaj, nuk ka habitur aspak me qëndrimin e tij lidhur me dhunën që policia përdori ndaj një grupi qytetarësh që tentuan të tubojnë më 9 maj, në sheshin Skënderbej.
As më shumë dhe as më pak, Lleshaj ka legjitimuar dhunën, duke konfirmuar atë për të cilën është shprehur si shqetësim, instalimin e një shteti policor.
Ndërsa shihte imazhet, ku shfaqeshin njerëz me uniformë ndërsa tërhiqnin zvarrë një qytetare, Lleshaj tha në Opinion se këtu nuk ka asgjë të jashtëzakonshme.
“Është një pamje e papëlqyeshme sigurisht, por shoqëria civile është një koncept shumë më i gjerë sesa 5 vetë që dalin hapur thyejnë një ligj në shërbim të qytetarëve. Sepse ka një ligj që ndalon tubimet publike në kohën e pandemisë. As tre veta nuk mund të dalin dhe ta sfidojnë ligjin kur ligji është në fuqi. Nëse do ta shihni me kujdes, kjo nuk është një ngjarje që meriton aq shumë vëmendje”, tha Lleshaj.
Dhe po të kihen parasysh deklarimet e ministrit të Brendshëm në ditët e para kur mori detyrën, kur tha se po të shihni një polic të dehur, ai jam unë, atëherë këta qytetarë që 3 ditë më parë dhunnonin qytetarët, kanë pikërisht fytyrën e Lleshajt.
Fevziu: Është një ngjarje që ka dominuar rrjetet sociale…
Lleshaj: Qytetarët janë në krah të policisë. Nëse të gjithë qytetarët do të silleshin kështu ne sot do të ishim në katastrofë. Ka patur shumë zëra që kanë nxituar të arrijnë në përfundime krejtësisht të paprpranueshme. Kanë artikuluar fjalën turp për Policinë e Shtetit, në fakt askush nuk mund të artikulojë këtë fjalë për Policinë e Shtetit. Ata po bëjnë detyrën në mënyrën më korrekte të mundshme. Mjafton të shihni pamjet e së njëjtës ditë përpara Bundestagut dhe do të shihni, që ka skena më të forta se këto.
Fevziu: Nuk kishte ansjë formë tjetër, të flitej me këta njerëz?
Lleshaj: Sigurisht, kur policia përdor forcën fizike e bën pasi konsumon gjithë të tjerat. Policia duhet të jetë një strukturë e verbër përpara ligjit, nuk mund t’i lemë policisë të interpretojë ligjin.
Fevziu: Policia ju ka vënë në dijeni, ka kërkuar urdhër?
Lleshaj: Jo dhe dua ta theksoj fort. Policia nuk vepron me urdhra, vepron me ligj, ka urdhër të përjetshëm të zbatojë ligjin.
Fevziu: Pasi patë këto pamje çfarë do u thonit këtyre policëve?
Lleshaj: Këtyre policëve nuk u them asgjë, kanë bvërë detyrën në përgjegjësi të plotë. Disa zërave të tjerë do u them të kenë kujdes kur i kërkojnë policisë gjëra kundër ligjit./Opinion.al
