Kryeministri Edi Rama, në krah të Ambasadorit të BE-së, Luigi Soreca, u shpreh sot se pas një viti punë, për pak kohë do të jetë gati drafti për ligjërimin e prodhimit të hashashit për arsye mjekësore. Rama bëri me dije se për draftin, është konsultuar me ekspertë vendas dhe të huaj.
“Kemi thuajse një vit që punojmë nuk bëjmë asnjë punë pa u konsultuar me ekspertë vendas dhe të huaj. Nuk kemi ardhur të shpikim, por të mësojmë sa më shumë nga të tjerët. Shumë shpejt do të jetë gati dhe do të hapet për diskutim publik, ashtu si drafti i amnistisë fiskale”, tha Rama.
Nga ana e Ambasadorit Soreca nuk pati asnjë reagim të drejtëpërdrejtë lidhur me deklaratat e Kryeministrit. Por disa orë më pas, BE sqaron se nuk ka pasur asnjë konsultim me Qeverinë shqiptare lidhur me kultivimin e kanabisit për qëllime mjekësore.
“Pas disa kërkesave për media, ne duam të sqarojmë se Komisioni Evropian dhe Delegacioni i BE nuk janë përfshirë në përgatitjen, hartimin ose konsultimin e projekt-raporteve në lidhje me planet për kultivimin dhe legalizimin e kanabisit për qëllime mjekësore në Shqipëri”, është reagimi nga BE.
Tashmë i mbetet Kryeministrit të sqarojë se cilët janë ekspertët e huaj lidhur me kultivimin e kanabisit për qëllime mjekësore.
Kujtojmë se në kohën e kanabizimit të vendit 2015-2016, Delegacioni i BE-së në Tiranë që në atë kohë drejtohej nga Romana Vlahutin, jo vetëm që nuk reagonte për u përdor qoftë nga ministri i Brendshëm i asaj kohe, Saimit Tahiri, dhe nga Kryeministri Edi Rama si një mburojë ndaj fakteve që publikoheshin mbi parcelat me hashash. Sa herë kishte debate me këtë çështje dhe kapeshin tonelata me hashash në brigjet e Italisë apo Greqisë, Qeveria në Tiranë tregonte raportet e BE-së mbi luftën ndaj kanabisit.
