Kryetari i PD-së, Lulzim Basha, i është përgjigjur bashkë-kryetarit të tryezës për Reformën Zgjedhore, Damian Gjiknurit, i cili i kërkoi zyrtarisht opozitës që Këshilli Politik të rifillojë javës tjetër dhe nëse nuk duan të vijnë është vendim i tyre.
Nga ana tjetër, Basha u shpreh se opozita nuk është larguar kurrë nga tryeza dhe se janë të gatshëm që ta përfundojnë Reformën.
“Nuk jemi larguar kurrë nga tryeza e Reformës Zgjedhore. Qeverisë i ka munguar vullneti për propozimet tona. Kemi gati propozime të tjera.
Nëse qeveria është e sinqertë s’ka pse të presë por jemi gati që nesër për të përfunduar një orë e më parë Reformën. Për ti dhënë shqiptarëve një qeveri legjitime që të kujdeset për fatin e shqiptarëve”, tha Basha.
Më herët, Gjiknuri deklaroi se “dëshira ime është që opozita të jetë pjesë integrale”.
“Një nga propozimet është për procesin zgjedhor, pra partitë të heqin dorë nga administrimi i procesit zgjedhor që është ‘game changer’. Shpresoj të kemi mundësi të gjejmë kompromis. Kolegji Zgjedhor ka ardhur momenti se është çështje kohësh derisa të krijohet Apeli që do të jetë edhe institucioni që do trajtojë ankesat.
Kemi rënë dakord që të përfshihet teknologjia, që KQZ të merret me votën e emigrantëve pra si do të bëhet votimi në distancë. Nuk i kemi lidhur duart vetes vetëm me ligj, por organet të bëjnë rregullat. Qeveria tranzitore nuk është kusht i Reformës Zgjedhore, është çështje politike”, tha ai.
