Sa do të zgjasë pandemia e koronavirusit, e cila qysh prej muajit janar goditi fillimisht Kinën dhe më pas të gjithë botën? Sipas një parashikimi të qendrës së sëmundjeve infektive ‘Center for Infectious Disease Research and Policy’ (CIDRAP) në Universitetin e Minnesota, SHBA, pandemia do të zgjasë nga 18-24 muaj.
Siç raporton CNN, thënë ndryshe pandemia do të zgjasë deri kur 60-70% e popullsisë të jetë infektuar nga Covid-19.
Sa i takon vaksinës, shpresa është e madhe, por sipas qendrës amerikane të sëmundjeve infektime, rezultati nuk do të jetë i shpejtë.
“Virusi nuk do të ndalë deri sa të ketë infektuar 60-70% të popullsisë. Ideja që do të përfundojë shpejtë sfidon mikrobiologjinë”, tha drejtori i CIDRAP, Mike Osterholm.
Nga ana tjetër epidemiologu i ‘Harvard School of Public Health’ dhe një tjetër autor i studimit, Marc Lipsitch, nënvizon se “Bazuar në studimet e fundit për pandemisë, virusi me gjasë do të zgjasë nga 18 deri në 24 muaj. Gjatë kësaj periudhe imuniteti i popullsisë do të forcohet”.
Studimi nënvizon se vaksina mund të ndihmonte, por se nuk do të jetë në dispozicion para vitit 2021.
