Kryeministri Edi Rama njoftoi sot se javën e ardhshme do të hapet blloku i dytë i bizneseve për ushtrimin e aktivitetit, ndërsa shtoi se brenda 24 orësh do të përcaktohen nga ekspertët se cilat aktivitetet do të lejohen.
Rama tha se këto biznese duhet të pajisen me protokollin përkatës dhe të marrin masat e nevojshme për të mos përhapur koronavirusin për punonjësit e tyre apo qytetarët. Sipas Ramës, me këtë fashë të dytë biznesesh do të rikthehen në punë rreth 27589 punonjës.
“Do të hapen: Shitje me pakicë në dyqane jo të specializuar. Shitje me pakicë e mallrave të reja në dyqane të specializuara, tregtia me pakicë e këpucëve në dyqane të specializuar, pajisje ndriçimi, tregtia me pakicë e luleve, tregtia me pakicë e orëve dhe bizhuve, tregtia me pakicë e lojërave në dyqanet e specializuar, tregtia me pakicë e pajisjeve sportive, shitja me pakicë e pajisjeve të telekomunikacionit. Do të hapet edhe protokolli i shërbimit taksi që ka një tërësi kërkesash specifike dhe shërbimi taksi është pjesë e listës për javën e ardhshme, sigurisht me vetëm një person brenda“, tha Rama.
Kreu i Qevetrisë njoftoi se gjithashtu do të lejohet edhe shërbimi taksi, por me kushtin që do të kenë vetëm një pasagjer, i ulur diagonal me shoferin.
“Askush nga ata që përfshihen në skemat e ndihmës, qoftë për ata që marrin pagën e luftës apo bonus lufte, do të vazhdojnë të marrin pagesat, pavarësisht se do të lejohen të punojnë, pasi ne e kemi të qartë se për disa javë, nuk do të mund të realizojnë xhirot e tyre para krizës nga koronavirusi”, tha Rama.
Ai shtoi se brenda javës së parë të majit në llogaritë bankare do të jenë të derdhura të gjitha paratë që u janë premtuar.
Lidhur me punonjësit në të zezë, që sipas Ramës llogariten në rreth 70 mijë familje, dhe që nuk kanë përfituar nga paketat e deritanishme, Kryeministri tha se brenda kësaj jave do të ketë një nisëm financuese, për t´I ardhur në ndihmë këtyre familjeve.
“Një ndihmë ekonomike direkte do e bëjmë shumë shpejt, duam të shkojmë pak më shumë se 8 mijë lekë të reja që parashikohet si ndihmë ekonomike”, tha Rama.
Gjithashtu Kryeministri njoftoi ngritjen e një Task Force qendrore, e cila do të monitorojë zbatimin e protokolleve të sigurisë në punë, duke ndarë edhe bizneset lidhur me rrezikun që kanë në përhapjen e koronavirusit.
