Kryeministri Edi Rama tha në sallën e Kuvendit se ekspertiza e komitetit të ekspertëve shqiptarë është në nivelin më të lartë të mundshëm në nivelin botëror, duke shtuar se në aspektin e masave të marra nuk i kemi zili asnjë shteti.
Rama tha se falë masave të marra në kohën e duhur u shmang ai numri i viktimave që sot po ndeshen nga vendet më të mëdha si SHBA dhe deri në vende të vogla si Luksemburgu.
Kryeministri u shpreh se lufta po bëhet në dy fronte, një me “armikun e padukshëm” dhe tjetra me ekonominë, për ta shpëtuar atë nga kriza që ka shkaktuar pandemia e Covid-19.
E ndërsa më parë citonte OBSH dhe këshillat e saj lidhur me pandeminë, Rama pohoi se informacionet e dhëna prej saj kanë qenë kontradiktore.
“Por falë grupit tonë të ekspertëve mund të them se asnjë vend tjetër nuk ka bërë më shumë se ne.
Sot flasin për ato qeset që po i shpërndahen njerëzve në nevojë, ato që i bëjnë llogaritë pa hanxhinë, që hanë e pinë e hanë e pinë , më shumë se të tjerët, dhe s´bëjnë asgjë.
E dini ju se Presidenti i Francës ka caktuar një shifër 150 euro plus për familjet me asistencë në atë vend dhe unë flas me fakte dhe shifra.
Franca ka dhënë 1500 euro plus për mjekët në zonat e kuqe, ne kemi dhënë 1000 euro plus, dhe 500 euro për infermierët dhe shoferët e ambulancave.
Mos na shisni dëngla këtu”, iu drejtua Rama një grupi deputetësh të quajtur si “opozita e re”.
Në vijim, Kryeministri theksoi se riatdhesimet në Shqipëri kanë shkaktuar valë të reja të koronavirusit.
“Të ka futur karantina në situatë absurd. Po të mos kishim marrë ne ato masa, nuk e di sa prej jush do të ishin këtu sot. Zoti të jep jetën, të jep edhe mendjen, dhe të thotë tani mbro veten që të të mbroj ”, u shpreh Rama.
