Nga Boldnews.al
Me një Urdhër verbal të kryeministrit Edi Rama, pensionistët shqiptarë nuk do të mund të dalin nga shtëpia nga e Hëna, edhe në ato fasha orare që lejohen për pjesën tjetër të qytetarëve.
Rama e deklaroi këtë masë ekstreme, në atë që ai e konsideroi si masë për parandalimin e përhapjes së korona-virusit në radhët e moshës së tretë.
Në një dalje virtuale, Rama deklaroi këtë fundjavë se: “Ata (pensionistët), të vetmuarit dhe që nuk i kanë fëmijët në të njëjtën njësi administrative do të kujdesemi ne siç po kujdesemi pa pushim me ekipet në terren t’ju bëjnë pazaret dhe t’ju çojnë ilaçet. Nuk do të dalin më pensionistët në rrugë”.
Premtimi i pamundur
Ky premtim deklarativ i kryeministrit është tërësisht alogjik, mbështetur në shifrat zyrtare. Ky izolim do t’u nxisë pensionistët, sidomos ata të vetmuarit, që të sillen rrugëve si “ilegalë” për të plotësuar nevojat e tyre më emergjente.
I shohim me radhe disa të dhëna statistikore, të cilat e nxjerrin Ramën zbuluar dhe pa asnjë mundësi reale për të ndihmuar pensionistët e vetmuar
– Shqipëria ka aktualisht rreth 500 mijë pensionistë. Këtë shifër e deklaroi pak ditë më parë edhe Drejtori i Postës Shqiptare, kur deklaroi se punonjësit e tij janë angazhuar t’ua përcjellin pensionin në shtëpi të moshuarve, me qëllim që të shmangin grumbullimin në sportele në këtë situatë pandemie.
– Shoqata e Geriatrisë dhe Gerontologjisë (për studimin e të moshuarve), në një analizë të publikuar në Tetor 2019, përllogariste që rreth 20-25 përqind e të moshuarve (pensionistëve) në Shqipëri ishin të vetmuar, pra, pa fëmijë ose me fëmijë larg banesës (në emigrim apo zona larg vendbanimit të tyre).
Pra, referuar kësaj përllogaritjeje, më e pakta 100 mijë pensionistë, jetojnë të vetmuar. Pikërisht, për këtë numër gjigand foli Edi Rama, kur tha që “do të përkujdeset qeveria për nevojat e tyre, ndërkohë që ata do të jenë në izolim”.
Bllofi
Por, a do të mundet Edi Rama dhe kushdo që e mbështet në “marrëzinë e tij politike” për izolimin total të pensionistëve?
Mendimi i parë që i shkon kujtdo në mendje është që Edi Rama do të angazhojë policinë, si për çdo gjë tjetër, për t’u ardhur në ndihmë pensionistë të vetmuar.
Shteti shqiptar përllogarit, në total, rreth 10 mijë forca policie, duke përfshirë këtu edhe kryepolicin Ardi Veliu dhe të gjithë stafin administrativ të Sandër Lleshajt. Pra, sikur policia të mos bëjë asnjë punë tjetër, por vetëm të realizojë blerje për pensionistët e vetmuar, duhet që një polic t’i shërbejë minimumi 10 pensionistëve të vetmuar. Thjesht, e pamundur.
Shteti shqiptar llogarit diku te rreth 4 mijë forca ushtarake aktive. Edhe në rast se të gjithë këta, pa bërë asnjë punë tjetër, t’u bashkoheshin forcave policore, nuk do të mund të mbulonin më shumë se sa 7-8 pensionistë të vetmuar për çdo individ me uniformë. Thjesht, e pamundur
Shteti shqiptar përllogarit rreth 100 mijë të punësuar në administratë. Nëse të gjithë zyrtarët do të angazhoheshin për të ndihmuar pensionistët e vetmuar, ata mund t’ia arrinin. Por, në një kohë, kur po me urdhër të Edi Ramës, rreth 80 përqind e administratës është në izolim për shkak të masave parandaluese, edhe kjo zgjidhje është thjesht, e pamundur.
Atëherë, ku do të gjenden këta 100 mijë persona, të cilët do të ndihmojnë pensionistët e vetmuar të Shqipërisë.
Llogaritë nga dritarja virtuale e Surrelit dalin të gjitha fiasko.
