Presidenti Ilir Meta përmes një postimi në rrjetet sociale shkruan se mirëpriten të gjitha idetë dhe propozimet realiste e konstruktive për përballimin e situatës ekonomike e sociale.
Meta apelon që idetë dhe propozimet duhen mirëpritur e studiuar me përgjegjshmëri dhe vizion në interesin më të mirë të vendit dhe qytetarit, jo vetëm tani, por dhe në perspektivë afatgjatë.
Kreu i Shtetit ka reaguar pasi vendi është përfshirë nga pandemia botërore e koronavirusit, ndërsa qeveria ka marrë një seri masash esktreme me qëllim mospërhapjen e virusit, por që penalizojnë bizneset.
Bizneset i janë drejtuar qeverisë me disa paketa ku kërkojnë lehtësira, por edhe fonde mbështetëse.
Pritet që sot Qeveria të bëjë publike masat për shmangien e një jrize ekonomike, ndërsa Kryeministri Edi Rama ka deklaruar se cilido punonjës që ka respektuar karantinë, duke qëndruar në shtëpi, do të marrë pagën në fund të muajit.
