Policia e Shtetit ka dhënë detaje mbi bllokimin e një skafi me 500 kg lëndë narkotike.
Policia tha se ka arrestuar dy persona, ndërkohë më herët ishte njoftuar për 3 të ndaluar.
Në një njoftim zyrtar, policia bëri të ditur se ka finalizuar operacionin “Godull”, si rezultat i të cilit u bë ndalimi shtetasve:
-S. Z., 60 vjeç, lindur në Durrës dhe banues në Kurbin;
-R. S., 28 vjeç, banues në fshatin Thumanë;
“Shërbimet e Policisë, gjatë kontrollit të ushtruar në vendin e quajtur “Godull”, Kurbin, në një ambient në pronësi të shtetasit S. Z., gjetën dhe sekuestruan në cilësinë e provës materiale 613 kg lëndë narkotike, e dyshuar cannabis sativa, si dhe në një ambient tjetër, po në pronësi të këtij shtetasi, gjetën dhe një gomone.
Gjithashtu, gjatë kontrollit të banesës së shtetasit S. Z., është gjetur dhe sekuestruar një armë gjahu dhe 13 fishekë.
Nga veprimet e para hetimore rezultoi se këta shtetas, në bashkëpunim me njëri-tjetrin do trafikonin lëndën narkotike.
Vijon puna për identifikimin e personave të tjerë të përfshirë në këtë veprimtari kriminale.
Materialet procedurale i kaluan për ndjekje të mëtejshme, Prokurorisë pranë Gjykatës së Shkallës së Parë Kurbin, për veprat penale “Trafikim i narkotikëve”, kryer në bashkëpunim, mbetur në tentativë dhe “Mbajtja pa leje e armëve të gjuetisë””, thuhet në njoftimin e policisë
