Policia e Korçës, në bashkëpunim me komisariatin e Devollit, ka goditur një rast të tentativës së trafikimit të lëndëve narkotike drejt Greqisë.
Si rezultat është arrestuar një person, ndërsa është shpallur në kërkim bashkëpunëtori i tij. I arrestuarit po transportonte me automjet, dyshohet drejt kufirit me Greqinë, 16 kg lëndë narkotike kanabis.
Operacioni i koduar “Cross Border” është ekzekutuar pas një hetimi disa javor. Në kuadër të këtij operacioni është vënë në pranga shtetasi Julian Belortaja, 46 vjeç, ndërsa në kërkim është shpallur shtetasi D. M., 37 vjeç, të dy banues në Korçë.
“Gjatë operacionit, shërbimet e Policisë ndaluan për kontroll në fshatin Vishocicë, Devoll, automjetin që drejtohej nga shtetasi Julian Belortaja. Shërbimet e Policisë gjetën në bagazhin e automjetit një çantë sportive, brenda së cilës ishin 15 pako të mbështjella me natriban, me peshë totale 16 kg, lëndë narkotike kanabis sativa.
Nga hetimet e deritanishme rezultoi se shtetasi Julian Belortaja, në bashkëpunim me shtetasin D. M., për të cilin vijon puna për kapjen e tij, do ta trafikonin drejt Greqisë sasinë e lëndës narkotike.” – thuhet në njoftimin e Policisë.
Autoritetet policore thonë se në drejtimin e Prokurorisë vijon puna për identifikimin dhe kapjen e personave të tjerë që mund të jenë përfshirë në këtë veprimtari kriminale.
Materialet procedurale i kanë kaluar Prokurorisë së Korçës për veprime të mëtejshme.
