Shtyhet mbledhja e tryezës për Reformën Zgjedhore, parashikuar për t’u zhvilluar sot. Siç mësohet shtyrja e mbledhjes është kërkuar nga Partia Demokratike, e cila duket se ka kërkuar më shumë kohë lidhur me çështjen e ndryshimit të sistemit zgjedhor.
Në mbledhjen e parashikuar për sot, e cila do të mbahet të hënën, pritej të debatohej lidhur me sistemin zgjedhor. Deri më tani ka pasur propozime të ndryshme lidhur me sistemin zgjedhor, ku herë është folur për listat e hapura të kandidatëve dhe herë për një sistem mazhoritar, që do të krijonte një lidhje më të mirë të deputetit me elektoratin.
Me kërkesë të përfaqësuesit të Partisë Demokratike, mbledhja e sotme është shtyrë për ditën e hënë, ora 10:00, me po të njëjtin rend dite.
Deri ditën e hënë pritet që opozita jashtëparlamentare të sjellë dhe propozimet e saja për çështjen e administratës zgjedhore.
Reforma Zgjedhore duhet të përmbyllet brenda 15 marsit, por sipas Damian Gjiknurit, përfaqësuesit të PS-së, kjo duket e pamundur. Në anën tjetër demokratët përmes Oerd Bylykbashit shprehen se data 15 mars nuk negociohet, çka do të thotë se opozita e bashkuar kërkon respektimin e afateve të vendosura më parë.
