Luhet mbrëmjen e sotme, ora 19:00, derbi i kryeqytetit mes Tiranës dhe Partizanit.
Ky do të jetë derbi me numër 156 mes dy skuadrave me titulluara në Shqipëri, ndërsa si gjithmonë të gjesh një favorit në këtë ndeshje është një detyrë mjaft e vështirë. Tirana vjen me moralin e lartë pas 9-të fitoreve në 10 ndeshjet e fundit ndërsa në ndeshjen tjetër kanë barazuar.
Partizani është kampionia në fuqi e Superligës dhe e luan këtë ndeshje pikërisht për të mos e humbur këtë status. Momentalisht “Të Kuqtë” gjenden gjashtë pikë larg Tiranës kryesuese por një fitore mund të ndryshojë shumë gjëra si në tabelën e klasifikimit ashtu edhe në anën psikologjike të skuadrave.
Nga ana tjetër, Tirana me rezultatet që ka treguar javët e fundit tregon që mund të jetë favorite në këtë ndeshje por siç thamë më lart historia shpesh ka treguar se forma nuk do të thotë asgjë.
Për sa i përket mungesave, për Partizanin do të mungojë Lorenc Trashi ndërsa pritet ta zëvendësojë Esin Hakajt. Gjithashtu në repartin e sulmit do të mungojë Solomon, dhe pritet që sulmin ta udhëheqin Bardhi me Çinarin.
Në krahun tjetër te bardheblutë, ndryshimet krahasuar me javët paraardhëse do të jenë të pakta. Egbo madje i gëzohet faktit që në skuadër janë rikthyer Torassa dhe sulmuesi kryesor Michael Ngoo, i cili ka kaluar gjendjen gripale.
Një ndeshje e tillë mund të ndryshojë të gjithë fatin e sezonit, ndaj të dyja skuadrat pritet të jenë shumë të kujdesshme ndaj njëra-tjetrës me ndeshjen që mund të vendoset edhe nga detajet më të vogla, diçka që e kanë pranuar edhe trajnerët përkatës në konferencën për shtyp.
