Një mbledhje e përbashkët mes qeverisë Rama dhe asaj Kurti pritet të zhvillohet në Shkodër. Kjo u bë e ditur nga Kryeministri Edi Rama, pas takimit që pat me homologun Kosovar, Albin Kurti.
Rama nuk dha detaje se kur do të mbahet kjo mbledhje e përbashkët, e cila duket se do të jetë në vazhdën e mbledhjeve të zhvilluara më parë në Shqipëri dhe Kosovë.
“Ishte kënaqësi që mirëpritëm delegacionin nga Kosova me Kryeministrin e Kosovës të sapozgjedhur.
I dashur Albin mirëserdhe dhe më vjen mirë që kemi pasur një komunikim të hapur të rëndësishëm.
Synojmë një shpejtësi të re në bashkëpunim për të jgitha fushat, për të gjetur angazhim të plotë.
Kemi rëndë dakord për mbledhjet e dy qeveri që do mbahet në Shkodër, sepse e fundit ishte në Pejë dhe aty caktuam Shkodrën”, u shpreh Rama.
Ai u shpreh se duhet hequr kufiri mes Shqipërisë dhe Kosovës, ndërsa theksoi se jemi 100 % për njohjen e saj.
Lidhur me mbledhjen e përbashkët, Albin Kurti, tha se ekziston vullneti dhe plani për të diskutuar zbatueshmërinë e marrëveshjeve të firmosura deri më tani, por edhe atyre që do të firmosen.
“Do avancojmë bashkëpunimin, parashikimet s’janë tonat, por planet po”, tha Kurti.
Kryeministri Rama tha se një shpejtësi e re në marrëdhëniet mes dy vendeve është e domosdoshme, duke shtuar se Komisioni Ndërshtetëror, do t’i japë mundësi dy qeverive për të parë ecurinë e marrëveshjeve dhe për nënshkrimin e marrëveshjeve të reja.
