Ambasadorja amerikane në Tiranë, Yuri Kim, ka nisur një takim me Kryetaren e LSI-së, Monika Kryemadhi, në selinë e kësaj force politike.
Takimi është në vazhdën e kontakteve që diplomatja amerikane po vendos me drejtues të forcave politike dhe institucioneve në vend, që prej marrjes zyrtarisht të detyrës.
Besohet se në qendër të bisedës mes Kim dhe Kryemadhit do të jetë situata politike në vend, si dhe ecuria e reformës zgjedhore dhe asaj në drejtësi.
Kim është takuar më parë me Presidentin Meta, Kryeministrin Rama, kreun e PD-së, Basha, si dhe ministra dhe drejtues të institucioneve të drejtësisë, përfshi edhe drejtuesit e SPAK dhe Gjykatës Speciale.
Në të njëjtën kohë që Yuri Kim nisi takimin me Kryemadhin, në selinë e Presidencës ka nisur takimi mes Kreut të Shtetit, Ilir Meta, dhe delegacionit të Venecias që ka ardhur në Shqipëri për atë që njihet si paketa anti-shpifje, për të cilën pritet që Komisioni të japë opinionin e tij në datën 20 mars. Meta ka kundërshtuar paketën e propozuar nga Qeveria duke e cilësuar atë si anti-Kushtetuese, ndërsa mazhoranca u tërhoq nga votimi i dekreteve të Presidentit, edhe pse më parë ishte paralajmëruar rrëzimi i tyre.
Po kështu raportohet se në Tiranë ka mbërritur grupi i ekspertëve të ODIHR që do të asistojnë diskutimet mes pozitës dhe opozitës për reformën zgjedhore. Ekspertët do të kenë një takim pasditen e sotme me Këshillin Politik dhe pritet të ofrojnë qëndrimet e palëve për çështje që nuk janë dakordësuar.
