Nga BoldNews.al
KÇK-ja antikushtetuese e Edi Ramës nisi ditën e parë të punës me show-bllofin e sekuestrimit të kompleksit “Golden” në Shijak, i vënë nën sekuestro që në vitin 2015 nga Gjykata për Krime të Rënda.
Ndërkohë, burime nga Policia e Shtetit, shpërndajnë në mënyrë “informale” në media se tashmë kanë në dorë të dhënat për të paktën 60 persona, të dënuar apo të dyshuar si të përfshirë në krimin e organizuar, të cilët do të kalojnë në sitën e “Operacionit Forca e Ligjit”.
Përtej propagandës, është ende e paqartë nëse “Anti-KÇK-ja”, megjithëse anti-ligjore, do të arrijë të godasë eksponentë të krimit të organizuar, të cilët kanë lidhje të ngushta me politikanë të nivelit të lartë.
Një prej këtyre eksponentëve me lidhje të fuqishme është Agron (Geron) Xhafaj, vëllai i ish-ministrit të Brendshëm dhe aktualisht deputet i Partisë Socialiste, Fatmir Xhafaj.
Agron (Geron) Xhafaj është duke vuajtur aktualisht (?!?!) dënimin me 7 vjet e 6 muaj, të dhënë nga drejtësia italiane, për pjesëmarrje në organizatë kriminale të përfshirë në trafik narkotikësh, me vendimin nr. 2232/212, dt.25.09.2012 të Gjykatës së Kasacionit të Italisë.
Akti Normativ “Anti-KÇK” parashikon që do të kalojë në filtrin e Policisë pasuria e të dënuarve për përfshirje në krim të organizuar, si edhe familjarëve të tyre, përfshirë vëllezërit.
Pra, “Anti-KÇK” e Ramës e shndërron në subjekt të verifikimit edhe Fatmir Xhafajn, vëllain e Geronit.
Policia e Shtetit, nëse do të marrë guximin për të verifikuar pasuritë e ish-ministrit të Brendshëm, do të ketë shumë punë. Pasuria e Fatmir Xhafajt është me të vërtetë e madhe, krahasuar edhe me shumë politikanë të tjërë.
Pasuria e Fatmir Xhafaj
“Boldnews.al” ka siguruar deklaratat e pasurisë ndër vite të Fatmir Xhafaj, të siguruara në bazë të një kërkese për informim drejtuar Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI).
Në bazë të të dhënave të vetëdeklaruara nga Fatmir Xhafaj, deri në fund të vitit 2018, rezulton se ai dhe familja e tij kanë në pronësi 4 apartamente, tre dyqane, një Benz me vlerë 54 mijë euro, si edhe mijëra euro e miliona lekë në llogari bankare.
Fatmir Xhafaj deklaron në formularin fillestar, në vitin 2003, se ka në pronësi 3 apartamente dhe 3 dyqane.
Në vitin 2005, Fatmir Xhafaj blen me kredi edhe një apartament tjetër, me vlerë 115 mijë euro, një pjesë e të cilit paguhet me kredi. Ndërkohë, familja Xhafaj kishte nisur të siguronte të ardhura të konsiderueshme nga qiraja e dyqaneve në Vlorë, për të cilat merr pagesë mujore për shumë vite.
Po ashtu, një pronë në Pogradec, ku bashkëshortja e Fatmir Xhafaj është bashkëpronare, jepet për ndërtim.
Në vitin 2009, Fatmir Xhafaj deklaron se kishte depozituar në llogari bankare shumat 8.5 milionë lekë të reja, si edhe 44 mijë euro. Këto shuma i tërheq nga banka dhe i jep hua personave të tjerë.
Në vitin 2011, Fatmir Xhafaj deklaron se ka siguruar 6.7 milionë lekë të reja nga shitja e një prone në Pogradec, në emër të bashkëshortes.
Në vitin 2013, familja Xhafaj arkëton edhe rreth 11 milionë lekë të reja, nga shitja e apartamenteve të fituar nga dhënia e pronës, ku bashkëshortja e politikanit ishte bashkëpronare.
Ndërkohë, të ardhura nga qiraja e dyqaneve vijonin me ritëm të kënaqshëm për familjen Xhafaj, duke vijuar me pagesa që variojnë nga 10 mijë deri në 13.500 euro në vit.
Tashmë, do të jetë në vullnetin e kryeministrit Edi Rama dhe forcës së tij “të posaçme” Anti-KÇK për të vendosur nëse do të nisin veprime verifikuese ndaj pasurisë së Fatmir Xhafaj dhe nëse do ta thërrasin që të plotësojë deklaratën e pasurisë në polici brenda 48 orëve.
