Anti-KÇK nis sot veprimtarinë në terren, ashtu sikundër është paralajmëruar nga zyrtarët më të lartë të qeverisë.
Një ditë më parë, Kryeministri Edi Rama dhe ministri i Brendshëm, Sandër Lleshaj, në një ceremoni të organizuar në formën e një shoë, zgjodhën të japin mesazhe paralajmëruese ndaj atyre që i konsiderojnë pjesë e organizatave kriminale, por edhe ndaj prokurorëve dhe gjyqtarëve, për të cilët u tha se nuk kalojnë vetting.
Veprimtaria e njësisë speciale do të jetë e përqëndruar në pasuritë e tyre, duke i lënë një afat 48 orësh për plotësimin e një formulari dhe më pas SPAK do të ketë në dispozicion 15 ditë dhe po kaq edhe Gjykata Speciale, për të marrë vendimet.
E ndërsa për ligjin anti-KÇK ka pasur reagime të forta nga opozita dhe shoqëria civile, duke argumentuar se bie ndesh me Kushtetutën, në rrjet ka plasur gallata me foto dhe meme.
Në qendër të tyre janë disa nga figurat qendrore të Rilindjes që nisin me Edi Ramën dhe vijojnë me Vangjush Dakon, Erjon Veliajn, Erjon Braçen, Elisa Spiropalin etj.
Ndaj të gjithëve ka pasur akuza publike lidhur me pasuritë dhe pyetja që shtrohet përmes memeve apo ironizimeve mbi anti-KÇK, është nëse pasuritë e tyre do të sekuestrohen, sikundër përcakton akti-normativ i miratuar.
