Deputeti Lefter Maliqi e konsideroi paketën anti-KÇK si një instrument që nuk do të përdoret kundër vetë KÇK-së që është në qeverisje apo oligarkëve të lidhur me të, që po pastrojnë paratë me ndërtimet në Tiranë.
Maliqi tha se peshku është qelbur nga koka dhe e vetmja mënyrë për të pastruar këtë situatë është vota e lirë.
Në vijim deputeti tha se alarmante është çështja e rendit dhe sigurisë në vend.
“Në qytetin e vendlindjes së ministrit të Brendshëm u vra një person me snajper dhe autori nuk u gjet. Në Tiranë u rrëmbye një shtetas dhe sot e kësaj dite nuk i keni gjetur trupin”, tha Maliqi, sipas të cilit situata e rendit dhe sigurisë në vend është alarmante.
Duke u ndalur te anti-KÇK, Maliqi paralajmëroi se kësaj nisme do ia dëgjojmë krismën. Në këtë kuadër, ai paralajmëroi se kjo polici-shtet që do jetë ndaj opozitarëve dhe jo ndaj oligarkëve të tyre që po pastrojnë paratë me ndërtime në Tiranë”.
“Këtu do jemi dhe do flasim sërisht për këtë KÇK që ka si kryetar vetë Kryeministrin. Kjo KÇK nuk do të përdoret kundër vetë KÇK që qeveris dhe drejton, as kundër oligarkëve të lidhur me Qeverinë, por do e përdorni kundër opozitarizmit”, tha Maliqi.
Deputeti tha se kishte thirrur në interpelancë ministren e Drejtësisë, Etilda Gjonaj, lidhur me situatën në burgje, e cila është një tjetër KÇK.
“Kush e ka emëruar Drejtorin e Përgjithshëm të Burgjeve, çfarë lidhje ka me familjarët e Edi Ramës?
Pse janë shkarkuar drejtorët ushtarakë të emëruar nga Sandër Lleshaj?
A ka qenë ky agjent i SHISH në 1997 në Vlorë? A ka qenë ky i shkarkuar nga komisariati nr 3 për shkak të një skandali? Nxirrini dokumentet”, iu drejtua Maliqi, ministres së Drejtësisë.
