Komisioni i Pavarur i Kualifikimit ka shtyrë sërish seancën dëgjimore për rivlerësimin e subjektit Elona Kana, bashkëshorte e nënkryetarit socialist të Komisionit Qendror të Zgjedhjeve.
Pasi e shtyu fillimisht për më shumë se tre muaj seancën për Kanën, KPK ka vendosur ta shtyjë sërish edhe me tre ditë. Në një njoftim zyrtar, Komisioni i Vetingut informon se “seanca dëgjimore për subjektin Elona Kana, e parashikuar për t’u zhvilluar në datën 30 janar, shtyhet për në datën 3 shkurt 2019, për arsye objektive”.
KPK nuk sqaron se cilat janë “arsyet objective”, por kjo shtyrje e re e shndërron në një lloj telenovele procesin e rivlerësimit për bashkëshorten e Denar Bibës.
Siç ka raportuar më parë “Boldnews.al”, KPK nisi procesin e Vetingut për Elona Kanën, në kohën kur ajo ishte ndihmës-ligjore në Gjykatën e Lartë.
Lexo edhe: KPK rikthen në Veting bashkëshorten e Denar Bibës, pas tre muajsh “pezullim”
Subjekti Kana, pas një testimi të zhvilluar nga Shkolla e Magjistraturës në maj 2018, fitoi të drejtën për të vijuar studimet dy-vjeçare për të marrë statusin e magjistratit.
Në Tetor 2019, trupa e vetingut, e përbërë nga kryesues Olsi Komici, relatore Xhensila Pine dhe anëtare Suela Zhegu, ftoi në seancë dëgjimore subjektin Elona Kana, pas përfundimit të hetimit administrative.
Në seancën e parë, subjekti Kana paraqiti një kërkesë proceduriale, ku kërkonte përjashtimin nga trupa gjykuese të relatores Xhensila Pine. Sipas Kanës, relatorja Pine hartuar një raport negativ dhe të njëanshëm, me qëllim që të godasë politikisht bashkëshortin e saj, Denar Biba, nënkryetar i Komisionit Qendror të Zgjedhjeve, i emëruar nga Partia Socialiste.
Pas kësaj kërkese, KPK vendosi të ndërprerë seancën, deri në shqyrtimin e rastit. Si rrallëherë, Komisioni i Vetingut mori mbi 3 muaj kohë për të shqyrtuar një kërkesë formale.
Gjithësesi, në përfundim, duket se KPK nuk e ka marrë në konsideratë kërkesën e Elona Kanës. Kjo konfirmohet nga fakti se, në njoftimin për ri-thirrjen e seancës dëgjimore, trupa gjykuese është e njëjta, përfshirë edhe relatoren Xhensila Pine.
Tashmë, pritet që Elona Kana të përballet me rezultatet e Vetingut në 3 Shkurt 2019, në rast se KPK nuk gjen arsye tjetër për të shtyrë seancën dëgjimore.
