Nga Boldnews.al
Kryeministri Edi Rama, sa herë gjendet nën kritika për vendimmarrjet e tij, siç është edhe rasti më i fundit i protestave qeveritare, justifikohet me argumentin: “Kam marrë 83 vota dhe do të bëj siç dua!”
Në një formë thuajse të ngjashme, edhe një klonim i tij politik, Denar Biba, kreu i Autoritetit të Konkurencës, mban thuajse të njëjtin qëndrim: “Nuk dua t’i jap llogari asnjë institucioni”.
Kjo deklaratë e Bibës nuk është meme, nga ato që po shohim rëndom këto ditët e fundit në sheshin kryesor të Tiranës. Kryekomisioneri i Konkurencës u tregua i prerë gjatë raportimit vjetor para Komisionit Parlamentar për Ekonominë, Punësimin dhe Financat, të hënën e kësaj jave (8 Qershor 2026).
Në diskutim ishte raporti i Autoritetet të Konkurencës, një institucion i krijuar me ligj, përballë Kontrollit të Lartë të Shtetit, një strukturë e ngritur drejtpërdrejtë nga Kushtetuta.
“Erdhi KLSH tek ne dhe kërkoi çdo lloj informacioni konfidencial dhe sekret për të kontrolluar mbi vendimmarrjet tona”, nisi diskutimin Biba. Sipas tij, “në vlerësimin tonë, kjo përbën cënim të pastër të pavarësisë së institucionit. Nuk mund të thotë një institucion tjetër, kushdo që kjo vendimmarrja juaj është proporcionale ose jo”.
Duket qartë se Denar Biba e konsideron veten dhe institucionin që drejton tërësisht “mbi palët”, kur e thekson se “asnjë institucion tjetër nuk mund të na kontrollojë”, ku, natyrisht, përfshihet edhe Parlamenti.
Dhe këtë bindje të tij e përforcoi më tej: “Ne na ka dhënë ligji diskrecionin që të vlerësojmë në përgjegjësinë tonë personale, administrative, edhe penale po të doni, se si do të jetë vendimmarrja jonë. Dhe, nuk mundet asnjë institucion tjetër, i pavarur, në këtë rast KLSH-ja, por edhe vetë Kuvendi i Republikës, që të na thotë se kjo vendimmarrja juaj është kështu apo ashtu”.
Në vijim, Denar Biba doli në rolin e tij si një “zëvendës-Lider” politik. Duke iu drejtuar deputetëve, ai u shpreh: “Nëse na keni mandatuar, keni besuar tek ne, tek profesionalizmi ynë. Ne nuk kemi për t’ia dhënë KLSH-së, as sot, asnjëherë këto vendimet tona”.
Denar Biba është në krye të Autoritetit të Konkurencës që prej vitit 2021. Ai rimori mandatin në prill 2026, me votat e Partisë Socialiste.
Në krye të Autoritetit të Konkurencës, ai nuk ka shënuar thuajse asnjë arritje të rëndësishme për të përmirësuar situatën në tregun shqiptar dhe për të zbutur efektet e monopoleve në sektorë të ndryshëm.
