“Duhet të vijojë solidariteti”, Kalaja: Njerëzit janë të paqartë, nuk ka ende faturë financiare për dëmet e tërmetit

Aktivisti Aulon Kalaja ishte i ftuar në studion e lajmeve të Fax News ku ka folur për problematikat e shumta që sipas tij vijojnë të kenë ende qytetarët e prekur nga tërmeti i 26 Nëntorit duke iu referur kryesisisht zonës së Bubqit në Fushë-Krujë.

Kalaja ka falenderuar gjithë personat që i janë bashkuar nismës së tij për të ndihmuar banorët e prekur në zonën e Bubqit me veshmbathje, batanije dhe ushqime, ndërsa ka apeluar që ky solidaritet që u tregua pas fatkeqësisë natyrore  të vijojë të mbetet.

“Ne të gjithë bashkë duhet ta kalojmë këtë fazë dhe të ngrihemi më të fortë. Periudha tranzitore mund të jetë e gjatë, gjasat nuk janë të mira por unë kam besim gjithësesi. Pse them se gjasat nuk janë të mira? Sepse kemi rastin e Korçës, për pasojat e tërmetit të parë që ra atje ende nuk është ofruar ndihmë ndaj banorëve. Zgjidhja për emergjencat janë kontenierët, sipërmarrës dhe qytetarë aktiv kanë ofruar disa kontenier duke i zhvendosur njerëzit nga çadrat. Por a është më mirë në kontenier apo në shtëpi? Natyrisht se është më mirë në shtëpi, por ashtu siç është më mirë në kontenier se në çadër duhet të sigurohet se derisa të ndërtohen shtëpitë e reja të afrohen ndaj banorëve kontenierë.

Ende sot nuk kemi një faturë financiare, dhe njerëzit janë të paqartë se si do të ndërtohet, kur dhe ku do të ndërtohet, si do të përdoren donacionet. Ndodhi fatkeqësia por ne duhet ta kthejmë në mësim. Kam shkuar aty me një synim, të ndihmoj aq sa njerëzit më mbështesin sepse dua ta them këtu, unë nuk bëj dot vetëm asgjë për ata sepse nuk i kam mundësitë personalisht por bëj thirrje për ata që mund të ofrojnë përkrahje. Ne jemi treguar të kujdesshmën në komunikimin me njerëzit dhe duam ta vijojmë këtë mbështetje më gjatë”.

 

LEXO EDHE  Raporti i OBSH për Shqipërinë/ Gjosha: Situata është shqetësuese, duhen zgjidhje imediate