Kandidati për deputet i Partisë Demokratike, Aulon Kalaja ka folur lidhur me një kërkesë që ai ka depozituar në KQZ ku ka kërkuar sigurimin e pamjeve filmike të numërimit të votave.
Kjo kërkesë e tij vjen pasi dyshon se është manipuluar vota preferenciale.
“Unë merrem me parimin, në rast se numëruesit e mi kanë vjedhur një votë, vota do kthehet te i zoti. Por nëse KQZ-ja nuk do e marrë përsipër, unë do i drejtohem prokurorisë. Do e bëj këtë se i kam premtuar qytetarëve se do e mbroj votën e tyre. Unë mandatin tim gjithsesi e kam marr, se kam marrë Krujën dhe Fushë-Krujën. Kam marr aq vota sa nuk ishte e pritshme”,-tha Kalaja.
I pyetur nga gazetari Flogert Muça nga studio e Euronews Albania nëse kërkesa e tij do dëmtojë kauzën e Partisë Demokratike, Kalaja tha:
“Unë nuk kam vjedhur asnjë votë, kam bërë një fushatë modeste që nuk kalon 10 milionë të vjetra. Madje i kam kërkuar edhe SPAK që ta vendos telefonin tim në përgjim. Unë besoj se do jetë vetë procesi që do e demaskojë. Unë nuk kam asgjë personale me askënd. Unë jam në betejën time dhe të drejtën time, koha do e tregoj nëse kam pasur të drejtë “,-tha Kalaja.
