Shumë monumente të kulturës në Shqipëri, ndonëse mbartin vlera të trashëgimisë dhe kulturës së popullit tonë, po degradojne dita ditës, duke u lënë në harresë nga Qeveria.
Një prej tyre është edhe Kalaja e Borshit, ose siç njihet ndryshe si Kalaja e Sopotit, e cila mbart vlera të pakontestueshme historike dhe arkitektonike dhe është trashëgimi e rrallë e kulturës në vendin tonë.
E ndërtuar mbi rrënojat e qytetit antic të Borshit, kjo kala daton që në shek e IV – III p.k., dhe që në krye të herës ka pasur një pozicion strategjik, duke qenë një urë lidhëse mes maleve Akrokeraune (Llogarasë) dhe detit.
Kalaja e Borshit përmendet dhe në kujtimet e Ana Komnenës, vajzës së Perandorit të Bizantit Aleksi I Komnenai. Ndërsa vlen për t’u theksuar dhe fakti se në periudhën e Ali Pashë Tepelenës, aty u ndërtua dhe një xhami, e vetmja në rivierën shqiptare, e cila sot është një arsye më shumë për ta vizituar këtë monument kaq të rëndësishëm.
Brenda kalasë, ku dikur lulëzonte një qytet i tërë, sot siç shihet edhe në videon e mëposhtme duken vetëm rrënojat e mureve të vjetra.
Territori aty është mbuluar nga bari dhe duket qartë se ky monument kulture nuk e ka patur përkujdesjen e shtetit prej shumë vitesh.
Kalaja e Borshit ka qenë e lakmuar nga të gjithë pushtuesit që kanë ardhur në këto anë, që nga romakët, bizantinët e deri tek osmanët, por siç duket për të nuk janë të interesuar më “rilindasit” e sotëm në Qeveri, pasi janë të zënë duke numëruar turistët e shumtë imagjinarë.
Kalaja e Borshit sot është kthyer në një gërmadhë, teksa është degraduar edhe nga kërkimet për flori të individëve të ndryshëm, me shpresën se aty do të gjejnë “fatin” që do u ndryshojë të ardhmen.
.
I vetmi investim që është bërë në Kalanë e Borshit është rruga që shihni në foton e mëposhtme, që të çon për tek Kalaja. Edhe ky investim është kryer nga Qeveria e Sali Berishës gjatë viteve 2008-2009.
Gjithsesi, për shkak të lashtësisë së saj, Kalanë e Borshit ka ende vizitorë që e vizitojnë, por nëse do të vazhdohet të lihet në harresë drejt shkatërrimit, ndoshta aty do të mbetet vetëm kodrina dhe historia….
