Jo të gjitha familjet e prekura nga tërmeti në qytetin e Durrësit janë akomoduar në apartamente me qera. Kjo, sepse ka pak apartamente për tu marrë me qera në qytet dhe kryeministri dha një propozim tjetër.
“Po punojmë për një zgjidhje jo aq optimale, jashtë Durrësit dhe shikojmë mundësinë e akomodimit në periferinë perëndimore të Tiranës. Nuk ka apartamente”, tha Rama në mbledhjen e dytë të Komitetit Kombëtar të Rindërtimit.
Sa i takon familjeve të prekura në Tiranë, sipas tij, të gjitha janë drejt akomodimit në apartamente me qera. “Nga 1120 familje të prekura në Tiranë mbi 900 janë të akomoduara, ndërsa pjesa tjetër janë në akomodim e sipër.”
Ndërkohë, Rama tha se është momenti për të nisur me riparime për banesa individuale ndërkohë “që bëjmë plane për ndërtesa të mëdha”.
Kryeministri Edi Rama deklaroi se në datë 16 dhjetor do të kemi raportin e parë për dëmet, që do të jetë paraprak, pasi finali pritet që të dalë në fund të janarit të 2020.
Ai njoftoi se Qeveria ka gati draftin e ligjit special të rindërtimit, ndërsa po përgatitet edhe aplikacioni për transparencën. “Po punojmë për një aplikacion për transparencën dhe besoj që në mbledhjen e ardhshme pas një jave do të prezantojmë. Kur të mblidhet komiteti do të prezantojmë. Këtu ka disa shpjegime për aplikacionin. Po përgatitet ligji special për rindërtimin për të krijuar një kuadër ekskluziv për të gjitha aspektet që kanë të bëjnë me rindërtimin. Një draft të parë e kemi gati, po bashkëpunojmë me komisionin e ligjeve për ta cuar drejt miratimit. Këtu kemi se cfarë përfshin; banesa të reja, për rindërtim, rindërtimi i të shemburave, rimëkëmbja ekonomike, banesat nga donatorët. Kemi 386 dosje projektesh për rindërtim. Dosje për fondacionet dhe donatorët për të shkuar në mënyrë të organizuar“, tha Rama.
