Një denoncim i bërë faqen e njohur “Lolita” në rrjetin social tregon mbi presionet që po ushtrohen ndaj punonjësve të administratës për të kontribuar me gjysëm page lidhur me përballimin e situatës së krijuar pas tërmetit të 26 nëntorit.
Denoncimi ka të bëjë pikërisht me institucionin e Agjensisë Shtetërore të Kadastrës (ASHK), ku sipas denoncueses, ndaj punonjësve po ushtrohet presion, deri në largim nga puna, nëse nuk kontribuojnë me gjysmën e pagës së tyre.
Denoncuesja thotë se ka dërguar ndihma, që janë mbledhur te Teatri Kombëtar, ashtu si shumë punonjës të ASHK-së.
Ndërkohë që e konsideron anormale dhe të paprecedentë presionin që po i ushtrohet.
Ajo thotë se ka punonjës që kanë kredi për të paguar ose jetojnë në banesa me qera, të cilët e kanë të pamundur të kontribuojnë me shuma të tilla.
Nuk dihet nëse denoncimi është ose jo i vërtetë, por nëse ai qëndron ky përbën një skandal, pasi edhe në deklaratat publike Kryeministri Edi Rama ka thënë se gjithkush duhet të kontribuojë sipas mundësive që ka në vlera monetare.
