Nga data 26 nëntor deri sot janë shënuar mbi 1 mijë lëkundje tërmeti, por këto janë me ritme më të ngadalta dhe në tërësi aktiviteti sizmik është drejt relaksimit. Kështu thotë sizmologu i Institutit të Gjeoshkencave, Edmond Nushi.
Nushi thekson se aktiviteti sizmik ka vijuar por me ritme më të ngadalta.
“Kemi theksuar se do të ketë dhe magnitudë dhe mikrotërmete që e kalojnë pragun e ndjeshmërisë. Kjo sepse zona ku zhvillohet aktiviteti sizmik është shumë afër Tiranës. Në tërësi aktiviteti është drejt relaksimi dhe magnitudat janë gjithmonë e më të ulëta. Në terma mesatarë magnitudat kanë ardhur duke u ulur”, thotë Nushi për Ora News.
Ndërkohë, lëkundja e fundit e regjistruar ishte në orën 09:02, me magnitudë 3.9 të shkallës Rihter. Epiqendra e tërmetit ishte 36 km nga Tirana dhe 19 km nga Shijaku.
