LSI, përmes zv.Kryetarit Luan Rama, i ka drejtuar një apel Kryeministrit Edi Rama, që në zonën e emergjencës përveç Durrësit, Tiranës e Laçit, të përfshijë edhe Lezhën.
Luan Rama ka postuar në rrjet një reagim ku thotë se në Lezhë janë 250 shtëpi të dëmtuara nga tërmeti.
“Qeveria korrigjon vendimin: përfshin Laçin në perimetrin e gjendjes së fatkeqësisë natyrore, por “harron” Lezhën me rreth 250 shtëpi të dëmtuara!
Qeveria duhet ta rishohë e ta rikonceptojë sërish vendimin e vet për shpalljen e gjendjes së fatkeqësisë natyrore siç bëri sot, duke përfshirë në perimetrin e përgjegjësisë shtetërore sipas ligjit për emergjencat civile bashkë me qarkun e Durrësit dhe të Tiranës, edhe Laçin ose më saktë bashkinë e Kurbinit.
Por, nëse kryeministri apo ata që e informojnë në qeverinë e tij nuk e dinë, po e informoj unë publikisht se dëme të rënda tërmeti i 26 nëntorit ka shkaktuar edhe në bashkinë e Lezhës, ku sipas verifikimeve të bëra nga autoritetet zyrtare rezultojnë të dëmtuara rreth 250 shtëpi.
Prandaj, duhet përfshirë edhe Lezha në perimetrin e gjendjes së fatkeqësisë natyrore”, shkruan Luan Rama.
Sipas tij, këtë e imponon ligji dhe përfshirja ose jo në vendimin e qeverisë për shpalljen e gjendjes së fatkeqësisë natyrore nuk është “dhuratë” që bën kryeministri, por shfaqje dhe marrje përgjegjësie nga ana e shtetit për të gjithë të dëmtuarit nga një fatkeqësi natyrore siç është edhe tërmeti.
“Meqë e përfshitë edhe Laçin në perimetrin e gjendjes së fatkeqësisë natyrore, pasi siç e thatë ju vetë dëgjuat zërin e kryetarit të PD-së Lulzim Basha, mos e harroni edhe Lezhën me rreth 250 shtëpi dhe objekte të dëmtuara dhe përfshijeni edhe atë, sepse edhe të dëmtuarit nga tërmeti në bashkinë e Lezhës janë në nevojë e shteti duhet t’i ndihmojë edhe ata njësoj si të dëmtuarit në qarkun e Durrësit, të Tiranës dhe të Laçit”, shkruan Rama në mesazhin e tij.
