Nga Boldnews.al
Kryeministri Edi Rama po e përdor “gjendjen e jashtëzakonshme” në një formë mjeti presioni dhe censure ndaj medias. Ai nuk e pati aspak problem që, në mesin e tragjedisë që përfshiu Shqipërinë në ditët e fundit, pas tërmetit, të kërcënonte median që përhap, sipas tij, “fake neës” dhe “panik”.
Si në çdo rast tjetër, edhe tek periudha pas-tërmetit, Edi Rama ka merakun më të madh tek imazhi, propaganda dhe shfaqjet populiste, përballë mijëra qytetarëve të tmerruar nga sizmat e pafundme që përfshijnë territorin shqiptar.
Ai duket se është më shumë i merakosur për të dalë si “çlirimtar” para medias, sesa të dëshmojë përulësinë e kryeshërbëtorit të popullit, në një prej momenteve më delikate të viteve të fundit.
Ai nuk e ka problem të aktrojë para kamerave, duke puthur e përqafuar të moshuar që nuk kanë strehë mbi kokë. Ai nuk e ka aspak problem që, me “ERTV”-në e tij të kthej në shoë ceremoninë e dhimbshme të varrimit të personave që humbën jetën në Thumanë.
Në këto ditë, kryeministri në vetë të parë, ka dalë shumë e shumë orë para kamerave, ndërkohë që qytetarët presin zgjidhje nga strukturat qeveritare. Pas tij, disa qeveritarë të tjerë, gjithashtu kanë pushtuar hapësirën mediatike me përlotje, përshpirtje, përulësi e me çdo emicion tjetër, në ato pak minuta para objektivëve.
Për kaq u duhet media. Për të përcjellë skenarin patetik qeveritar. Pjesa tjetër, abuzimet që po marrin udhë me ndihmat, dyshimet që po forcohen për mënyrën se si po menaxhohen fondet e ndihmës, nuk duhet të jenë pjesë e hapësirës publike, nuk mund të prishin “spektaklin nën rrënoja”.
Kush guxon të prishë këtë skenar, duhet linçuar dhe, madje, edhe kërcënuar me Polici. Nën petkun e “përhapjes së panikut” apo të “fake neës-eve”, struktura të veçanta pranë uniformave blu, mesa duket, kanë nisur monitorimin e mediave jo aq dashamirëse me qeverisë, ose, më saktë, të atyre që marrin “guximin” dhe tregojnë disa të vërteta.
Drejtuesit e një portali, “Jeta osh Qejf”, u shoqëruan mbrëmjen e së Enjtes në Polici, pasi ata “guxuan” të publikonin mesazhe shqetësuese nga qytetarët, të tronditur pas tërmetit.
Qytetarët, të traumatizuar nga pasojat tragjike të tërmetit me magnitudë 6.4, e të lëkundjeve të shumta sizmike pasuese, të terrorizuar nga çdo lloj sharlatani vendas apo të huaj që vishet me petkun e ekspertit dhe flet për cuname e valë të tjera tërmeti, i drejtohen platformave elektronike për të treguar shqetësimin e tyre.
Nën këtë situatë paniku të përgjithshëm, çdokush që ka një krisje në muret e banesave, mendon se mund të jetë në rrezik. Qytetarët kërkojnë vëmendje, zgjidhje, shpresë. Për këtë u drejtohen mediave, sidomos atyre on-line, që kanë një përhapje më të gjerë.
Mediat, të gjitha të gjendura pranë shqetësimit qytetar gjatë orëve të fundit, u kanë dhënë hapësirë mesazheve të qytetarëve, edhe pse në disa raste shqetësimi i tyre nuk ka qenë aq shqetësues.
Gjithësesi, diçka e dyshimtë më mirë të raportohet se sa të mbahet e fshehur. Por, pikërisht ky vullnet i medias, përfshirë edhe atyre on-line, nuk duket se përkrahet nga qeveria.
Burimi i vetëm, nga ku duhet marrë informacion “safi” është “ERTV” dhe konferencat mediatike të ministrave aradhë.
Nuk duhet të raportohen pamjet, kur persona zyrtarë të ngarkuar me shpërndarjen e ndihmave, i dërgojnë ato në dyqane për t’i shitur. Nuk duhen raportuar dëmtime në shumë zona të Shqipërisë së Mesme, pasi “përhapet panik”. Dhe, nën justifikimin e “përhapjes së panikut”, vjen policia në derë.
Nuk është ajo Polici, e cila duhet përgëzuar maksimalisht për ndihmën dhe mbështetjen që u dha banorëve të dëmtuar nga tërmeti. Nuk është ajo Polici, efektivët e së cilës u përlotën, duke nxjerrë trupa të pajetë nga rrënoja.
Jo, është një Polici tjetër.
Janë ata që monitorojnë median dhe shqetësohen kur këto të fundit shqetësojnë “Liderin”. Është ajo pjesë e Policisë, e cila, të paktën deri më tani, nuk ka guxuar të trokasë në dyert e kryebashkiakëve, për të verifikuar lejet që janë dhënë për godinat që u shkrinë si sheqer në ujë.
Është ajo pjesë e Policisë që synon “goditjen” e medias, që kjo e fundit të mos merret me problemet e qeverisë.
E gjitha kjo, nën justifikimin e ‘gjendjes së fatkeqësisë natyrore”, që po trajtohet si “gjendje e jashtëzakonshme” për shkak të rendit kushtetues. Edi Rama, në mos i di vetë, dikush ia ka shpjeguar që, në kushtet e “fatkeqësisë natyrore” nuk mund të cënosh liritë themelore, përfshirë edhe atë të shprehjes së lirë. Ai po e trajton situatën si “cënim të rendit kushtetues”.
Dhe, nën këtë justifikim, nuk është aspak çudi që forcat policore të mësyjnë në dyert e mediave që tregojnë më shumë të vërteta se sa “duhet”, për t’u treguar se “censura nuk ka brirë”.
