Gjykata e Tiranës dha sot masën e sigurisë “arrest me burg” për 33-vjeçaren Amarilda Leka, e cila akuzohet se u mori 50 mijë euro familjarëve të një të dënuari për vrasje, me pretendimin se do e lironte nga burgu.
Amarilda Leka hiqej si juriste e Gjykatës së Lartë dhe premtonte se mund të ndikonte tek gjyqtarët e kësaj gjykate për të liruar një të dënuar me 30 vite burg.
Amarilda Leka nuk është një emër i panjohur për drejtësinë shqiptare. Ajo në të kaluarën ka arritur të përfitojë me skema mashtrim rreth 24.500 euro familjarëve të një personi në paraburgim, për të ndërhyrë te gjyqtari i çështjes, me qëllim zbutjen e dënimit të të akuzuarit.
Sipas policisë, 33-vjeçarja nga Përmeti ka mashtruar B. Z, me banim në Tepelenë, duke i marrë 50 000 euro, me pretendimin se ishte juriste pranë Gjykatës së Lartë Tiranë dhe me njohjet që ajo kishte do të ndikonte pranë trupës gjykuese në Gjykatën e Apelit për Krimet e Rënda Tiranë dhe në Gjykatën e Lartë për të nxjerrë nga burgu shtetasin A. M.
Ky i fundit rezulton i dënuar me 30 vjet burg, për një vrasje të kryer në rrethana rënduese në Memaliaj, në vitin 2015. /Mapo/
