VIDEO/ Basha: Krizën politike po e shoh me sytë e qytetarëve, ja pse nuk rri në Tiranë…

Kreu demokrat Lulzim Basha ka vijuar turin e takimeve “Rrugëtimi për Shqipërinë” në zonën e Myzeqesë në një bashkëbisedim me fermerët.

Referuar krizës politike, Basha tha se ka zgjedhur t’a shohë atë me sytë e qytetarëve.

“Ju do pyesni mos është më mirë që kryetari i opozitës të rrijë në Tiranë e të merret me krizën politike! Unë kam zgjedhur ta shoh këtë krizë me sytë tuaj”, u shpreh Basha.

Në vijim ai ka shtuar se takimet e tij synojnë gjetjen e zgjidhjeve për hallet që i kanë vënë përfund familjet shqiptare, veçanërisht në zonat rurale.

Baha akuzoi qeverinë për zbrazjen e fshatrave nga banorët, me synim që të nxisë importin e produkteve nga jashtë, pasi ato kontrollohen nga 4/5 oligarkë.

“Blegtoria është totalisht e braktisur duke nxitur më shumë braktisjen e zonave rurale.

Fshatrat tona zbrazen që të nxitet importi i produkteve nga jashtë sepse kontrollohet nga 4-5 oligarkë të kalçetos dhe kjo bie në kurrizin tuaj”, theksoi Basha.

LEXO EDHE  Tenderi i ushqimeve, SPAK nis hetimet për Olta Xhaçkën

Ndërsa premtoi dixhitalizimin e bujqësisë, kreu demokrat tha se me një çip do të shmangen burokratët dhe hajdutët, duke ofruar subvensionet direkte.

“Është fare e thjeshtë, sepse çipi nuk kërkon kafe”, shtoi ai.

Në vijim, kreu demokrat u shpreh se mendja e këtij shteti është të nxjerrë edhe kacidhet nga xhepi juaj.

“Ka nxjerrë lloj lloj mënyrash për ta bërë këtë. Ne ofrojmë liri për të punuar dhe për të fituar. Liria dhe çlirimi nga frika e shtetit është gjëja e parë që do të bëjmë. Nuk do të shikoni më inspektorë si grerëza pas mjaltit që vijnë tju marrin ju gjithçka”, tha ai.

Sipas kreut të PD-së, zgjidhja e duhur për fermerët që të punojë rehat është zerimi i kostos së prodhimit dhe kjo bëhet vetëm me skemën e subvensioneve direkte.