Kuvendi miratoi me votim të fshehtë kandidaturat e propozuara nga KED për anëtarë të Gjykatës Kushtetuese.
Kuvendi votoi fillimisht për kandidaturën e Elsa Toska, e cila u zgjodh me 105 vota pro dhe dy kundra.
Ndërkohë kandidatja Fjona Papajorgji u zgjodh si anëtare e Kushtetueses me 105 vota pro dhe tre kundra.
Në fillim të procesit të votimit, Gramoz Ruçi tha se kandidatja Arta Vorpsi, e cila renditet e para në listën e kandidatëve të KED është automatikisht anëtare e Gjykatës Kushtetuese, për faktin se Presidentit të Republikës i ka përfunduar afati i përzgjedhjes dhe në bazë të Kushtetutës, ajo konfirmohet si anëtare e kësaj gjykate.
Gjatë paradites, Presidenti i Republikës iu drejtua me një apel deputetëve që të respektojnë Kushtetutën lidhur me zgjedhjen e anëtarëve të Gjykatës Kushtetuese.
Sipas Presidentit, i cili ka caktuar Besnik Muçin, si kandidatin e parë për anëtar të kësaj gjykate, i takon Kuvendit që të zgjedhë një anëtar, dhe anëtari i tretë zgjidhet nga Gjykata e Lartë.
Ngërçi u krijua, pasi Kuvendi përcaktoi zgjedhjet e dy anëtarëve të Kushtetueses pa respektuar rradhën e përcaktuar në Kushtetutë.
