Kuvendi është kthyer si pasarelat e modës.
Seancat parlamentare nuk kanë asnjë peshë, pasi ligjvënësit e pranishëm, qofshin Rilindas apo ato që quhen si “opozita e re” janë kthyer në çertifikues të çdo vendimi apo qëndrimi të mazhorancës.
Dhe këtë e provoi më së miri seanca e sotme kur u votuan dy anëtaret e reja të Gjykatës Kushtetuese.
Secila prej kandidaturave iu nënshtrua votimit të fshehtë elektronik, por përfundimi ishte i njëjtë: ato morën 105 vota pro.
Por ajo që tërheq vëmendjen në çdo seancë parlamentare është fakti se deputetët preferojnë të pozojnë apo ekspozojnë veshjet e tyre, që në jo pak raste janë firmato.
Fotot e mëposhtme tregojnë përkushtimin që kanë ligjvënësit për të pozuar, brenda dhe jashtë sallës së Kuvendit.
Shpesh shfaqen të qeshur, madje nuk ngurojnë të ftojnë edhe kolegë të tyre për të pozuar.
Ndoshta mendojnë të kenë kujtime të bukura nga koha si parlamentarë, pasi nuk dihet nëse shumica e deputetëve aktualë, do të kenë mundësinë të shkelin sërisht në sallën e Kuvendit në legjislaturat e tjera.