Çuçi, sytë nga Qielli për të shpenzuar 200 mln lekë për “Shqipëria punon tokën” në Sheshin “Skënderbej”

Nga Boldnews.al

Ministria e Bujqësisë shpreson që fundjavën e ardhshme të mos ketë reshje shiu, që të organizojnë panairin 200 milionë lekësh “Shqipëria punon tokën”, në Sheshin “Skënderbej”.

Në një njoftim zyrtar, institucioni i drejtuar nga Bledi Çuçi “informon se aktiviteti, i parashikuar për në datat 9-10 Nëntor, do të shtyhet me një javë, pra në 17 Nëntor. Shkak për këtë shtyrje janë reshjet e shiut, të cilat nuk do të siguronin mbarëvajtjen e panairit për tokën, i cili do të zhvillohej në qendër të Tiranës.

Megjithatë, Ministria e Bujqësisë duket optimist: “Parashikimet e sinoptikanëve thonë se gjasat për reshje shiu në datat 16 dhe 17 nëntor janë të pakta. Le të shpresojmë se do të ndodhë kështu. Ju mirëpresim fundjavën e ardhshme në sheshin “Skënderbej”, thuhet në njoftimin zyrtar.

Ministria e Bujqësisë nuk duket se ka një plan “B” se çfarë do të ndodh me Panairin, nëse edhe në datë 17 Nëntor do të ketë reshje shiu. Ndoshta, me sytë nga aparatët e telefonave inteligjentë, organizatorët e panairit do të qëndrojnë në pritje të sjelljes së motit.

Në fakt, nuk është hera e parë që zyrtarët kondicionohen nga kushtet atmosferike për të organizuar aktivitetet.

Disa muaj më parë, kryetari i Bashkisë së Tiranës, Erion Veliaj, spostoi “Ditën e Verës”, për shkak se në datë 14 Mars 2019 do të binte shi.

Me të njëjtin model, Çuçi vendosi ta shtyjë me një javë panairin. Krahas problemeve me reshjet e shiut, duket se lëvizja e Ministrit të Bujqësisë është “strategjike”.

LEXO EDHE  KPK konfirmon në detyrë Genti Xholin, prokurorin e Apelit të Tiranës

Pasi u përball me kritikat dhe ironizimet publike për organizimin e një Panairi, në të cilin “do t’i tregohen arat babait”, Çuçi ka menduar që të ketë një masivitet njerëzish në aktivitetin e Sheshit të betonizuar “Skënderbej”, ku nuk ka asnjë metër katror stere për të vendosur fidanët.

Data 17 Nëntor përkon me Festën e Çlirimit të Tiranës. Kryebashkiaku Veliaj, i cili duhet të ketë menduar ndonjë aktivitet “formal”, ka mundësi që të sigurojë praninë e njerëzve-vartësve të tij në aktivitetin e Bledi Çuçit.

Gjithashtu, data 17 Nëntor është caktuar për t’u luajtur ndeshja Shqipëri-Francë, në kuadër të “Euro 2020”. Pra, aktiviteti i Çuçit, në qendër të Tiranës, me siguri do të ketë edhe “turistë” të etur për të parë zhvillimin e bujqësisë shqiptare.

Nuk do të jetë aspak çudi që tifozët francezë, të cilët do të zgjedhin për të ndjekur ekipin e tyre të futbollit, të shndërrohen pa dashjen e tyre në “fasadë” të “Shqipëria punon tokën”.

Paralelisht me njoftimin shumë “shpresëdhënës” për mos-pasjen e reshjeve të shiut, Ministria e Bujqësisë ka shpallur fituesin e tenderit për organizimin e panairit “Shqipëria punon tokën”.

Në Buletinin e Prokurimeve Publike të datës 11 Nëntor 2019, Ministria e drejtuar nga Bledi Çuçi ka identifikuar si ofertë të suksesshme vlerën e ofruar nga kompania “PIK”.

Në tender kanë marrë pjesë 3 konkurentë dhe fitues është shpallur kompania që ka ofruar vlerën më të ulët- 17,946,669 lekë pa TVSH.