“Hipi gishtit dhe largohu”, ishte një nga pankartat që një grup vajzash dhe grash mbanin në duar ndërsa protestuan ndaj ambasadorit të OSBE-së, Bernd Borchardt.
Protesta u zhvillua në të njëjtën sallë, ku OSBE kishte organizuar një tryezë mbi lirinë e mediave, ndërsa ndërhyrja e 4 apo 5 grave duket se ka hutuar jo vetëm të pranishmit, por edhe personelin e sigurisë.
Protestueset janë zonjat e Unazës së Re, banore që prej një viti po luftojnë të mbrojnë shtëpitë dhe banesat e tyre nga shembja.
Fotot janë publikuar në rrjet nga vetë protestueset, që i prishën humorin që në mëngjes diplomatit të OSBE-së, i cili pak javë më parë nuk nguroi t’i tregonte gishtin, protestuesve të mbledhur para drejtorisë së Policisë së Tiranës.
Fillimisht Borchardt ka ngritur pyetjen se si ka mundësi që ato janë lejuar të hyjnë në sallë, ndërsa më pas në fund të një fjalimi që u sfumua nga akti i ndërmarrë nga zonjat e Unazës së Re, ai ka kërkuar falje për gjestin e tij.
