Deputetja Rudina Hajdari deklaroi sot nga salla e Kuvendit se është kërcënuar në zyrën e saj.
Hajdari kërkoi nga Kryetari i Kuvendit marrjen e masave përpara se të ketë viktima.
“Ju jam drejtuar me një kërkesë që kërkon që ju të siguroni ambientet e Kuvendit dhe Kryesisë së Kuvendit.
Nuk mund të ndodhë që deputetet të kërcënohen. Kam pasur raste që në zyrën time të vijnë personat të më kërcënojnë.
Asnjë deputet nuk duhet të marrë përforcime dhe të vijë këtu me njerëz të tjerë dhe të kërcënojë.
Merrni masa përpara se të kemi viktima”, iu drejtua Hajdari, kryetarit të Kuvendit.
Ndërkohë, Gramoz Rucci, në përgjigjen e tij, theksoi se problemet dhe përplasjet që ka sot opozita dhe grupimet parlamentare duhet t’i zgjidhin brenda tyre.
“U kam kërkuar punonjësve të shërbimeve të Kuvendit që të bëjnë detyrën e tyre. Kërkesën tënde ia kam përcjellë Ministrisë së Brendshme që të marrë masat mbi shqetësimet që keni ngritur”, tha Rucci.
