Opozita e bashkuar, e drejtuar nga Partia Demokratike, ka ngritur 3 grupe pune që do të merren me reformën zgjedhore.
Grupet teknike të punës drejtohen nga ish-deputetët Enkelejd Alibeaj dhe Oerd Bylykbashi, si dhe nga Sekretari për Çështjet Zgjedhore në PD, Ivi Kaso.
Të tre grupet e punës do të punojnë për një draft, i cili do t’i paraqitet jo vetëm mazhorancës, por edhe ndërkombëtarëve.
Drafti pritet të jetë gati në fund të nëntorit, pra rreth 1 muaj përpara se Kuvendi, referuar deklaratave publike të Kryeministrit Edi Rama, të miratojë propozimet për këtë reformë.
Ndërkohë një tjetër grup pune, që do të ketë si drejtues politik Gazmend Bardhin, dhe në përbërje të tyre janë 18 anëtarë, që do të ndahen: 7 PD, 3 LSI, 2 PR, 2 PDIU dhe nga 1 përfaqësues PAA, PDK, LZHK, PBDNJ, do të bëjë diskutimin mbi propozimet dhe do të integrojë draftet e përgatitura nga grupet teknike.
Ky grup pune do të mblidhet për të diskutuar mbi draftin e përbashkët të Reformës Zgjedhore, i cili do të diskutohet më gjerë me të gjitha partitë politike, nëse do të ketë një dialog mes maxhorancës dhe opozitës.
Opozita, që prej dorëzimit të mandateve të deputetëve, ka deklaruar se nuk njeh Komisionin parlamentar për Reformën Zgjedhore, që drejtohet nga Damian Gjiknuri dhe Rudina Hajdari.
Në tryezën e organizuar nga OSBE për reformën zgjedhore, opozita e bashkuar përmes Ivi Kasos, paraqiti një platformë me 5 pika.
