Kryeministri Edi Rama akuzoi Presidentin Ilir Meta nga foltorja e parlamentit se vendimi për shtyrjen e zgjedhjeve, sipas tij anti-kushtetues shkon në favor të “opozitës në rrugë”. Sipas Ramës, për vendimin e Metës, “prova më ulëritëse e lepurit që fle barkun e frikës janë jo vetëm nga zgjedhjet por edhe frika nga drejtësia”.
Kjo është e disata herë që Rama përmend se Meta ka frikë nga “drejtësia e re”. Më herët gjatë kësaj jave në konferencën për mediat, Meta u pyet nga gazetarët për këtë deklaratë.
“Unë skam frikë nga asgjë këtë e di Rama. E di edhe Ambasada Amerikane. Unë kam frikë nga përgjegjësia që kam para popullit shqiptar dhe detyra që kam. Dhe detyra që kam sot është shumë e lartë. Dhe meqë jemi te Reforma në Drejtësi, Reforma në drejtësi u miratua me konsensus dhe nëse ka një rekomandim pozitiv sot për Shqipërinë, Shqipëria e ka për shkak të luftës dhe imponimit të tim dhe të forcës politike që përfaqësoja, se Shqipëria as rekomandimin për negociatat nuk do ta kishte sot”, tha Meta.
Gjatë fjalës së tij në seancën e kësaj të enjteje, Rama lëshoi akuza personale ndaj Ilir Metës dhe vendimin për rrëzimin e 30 qershorit si datë e zgjedhjeve lokale, e quajti një “rrëshqitje të Presidentit”. Rama i mëshoi qëndrimit të mëparshëm se zgjedhjet lokale do të zhvillohen më 30 qershor. /BN/
LEXO EDHE: Rama: Nuk jam penduar që votova Metën si President
