Kryeministri Edi Rama u shpreh sot nga foltorja e Kuvendit gjatë mocionit me debat lidhur me çdekretimin e zgjedhjeve të 30 qershorit nga Presidenti i Republikës, se nuk është penduar që votoi Ilir Metën si kryetar shteti në 2017-ën. Rama tha se pas këtij vendimi të tij ai është kritikuar ashpër në rrjetet sociale nga ndjekësit. Por megjithatë, Rama nuk shfaqi pendesë dhe deklaroi se sërish do ta votonte Metën.
“Unë e kam votuar Ilir Metën si president. Shumë kush më ka kritikuar, në rrjetin tim social vazhdimisht më zhdëpin për zgjedhjen e tij, jo pak më kanë mallkuar dhe sa shfaqet Iliri me ndonjë nga paudhësitë e veta, më përvishen mua të gjithë. Nuk jam penduar. Po të ktheheshim pas në kohë, do të bëja sërish të njëjtën gjë. Ilir Meta u zgjodh president me votat e tij. Dhe votat tona mund ta pengonin atë, por nuk mund të zgjidhnin një president pa Ilir Metën. Sot e ka humbur të drejtën të qëndrojë në atë zyrë. Marrëzi antikushtetuese anulimi i zgjedhjeve në mes të fushatës. Kur e pyesin thotë ma përsërisni se nuk dëgjoj mirë se kam qenë sëmurë kohët e fundit. Sigurisht nuk ka bërë vetëm gjëra të këqija, por edhe gjëra të mira në karrierën e tij politike, i uroj sot ta dëgjojë mirë këtë rezolutë, nëse nuk është sëmurë…”, u shpreh Rama.
