Mijëra qytetarë protestuan dje për rreth 3 orë në bulevardin “Dëshmorët e Kombit” duke kërkuar largimin e Edi Ramës nga posti i kryeministrit.
“Rama ik” ishte kryefjala e protestës së djeshme, ndërsa opozita njoftoi mbajtjen e protestës së rradhës më 31 maj.
Po në këtë datë Partia Socialiste kishte njoftuar hapjen e fushatës për zgjedhjet e 30 qershorit, proces në të cilin opozita e bashkuar nuk ka marrë dhe nuk do të marrë pjesë, ndërsa ka paralajmëruar se do të bllokojë zgjedhjet.
Por sot përmes letrës së 5-të publike drejtuar kreut demokrat, Lulzim Basha, kryeministri Rama, njëherazi edhe kryetar i PS-së, ndër të tjera shkruan shtyrjen e ditës së çeljes së fushatës nga Rilindasit.
“Meqë lajmëruat grumbullimin e radhës në 31 maj, shtabi ynë elektoral vendosi ta spostojë në 1 qershor mitingun e çeljes zyrtare të fushatës – kollaj, nuk ishte një datë si ajo zgjedhjeve që s’e kemi ne në dorë”, shkruan Rama në mbyllje të letrës së tij.
