Kryeministri Edi Rama, njëherazi edhe kryetar i PS-së, do të mbledhë kryesinë e kësaj partie më 8 maj, dy ditë para mbledhjes së Asamblesë Kombëtare.
Burime nga PS konfirmojnë për Boldnews.al se në këtë mbledhje do të shqyrtohen emrat e kandidatëve për kryebashkiakë dhe do të finalizohet lista me 61 emra, që më pas do të miratohen në Asamblenë Kombëtare.
Në bashkëpunim me 12 koordinatorët e ndarë sipas qarqeve, Rama pritet të kalojë edhe njëherë në sitë emrat e propozuar.
Në disa nga bashkitë, kryesisht ato që cilësohen të niveleve të dyta apo të treta, janë propozuar disa kandidatë, ndonëse duket si një garë formale, për shkak se janë raportuar pothuajse të gjithë emrat e përcaktuar apo të preferuar, që do të kandidojnë për zgjedhjet lokale.
Burimet bëjnë të ditur se me përjashtim të një bashkie, në jug të vendit, që mund t’i lihet aleatëve, në të gjitha njësitë e tjera të qeverisjes vendore, socialistët do të kandidojnë me emrat e tyre, ndërsa do t’u kërkohet subjekteve të përfshira në koalicionin “Aleanca për Shqipërinë Europiane” që t’i mbështesin ato.
Mbledhja e kryesisë së socialist, që pritet të mbahet pasditen e së mërkurës të javës së ardhshme, do të pasohet nga ajo e Asamblesë Kombëtare, e cila njëherazi do të miratojë edhe kandidatët për këshillat bashkiakë.
