Shefja e diplomacisë europiane, Federica Mogherini, do të zhvillojë një vizitë zyrtare në Tiranë në datat 8-9 maj, që përkon edhe me aktivitetet që do të zhvillohen në kuadër të Ditës së Europës.
Sikundër mësohet, Mogherini do të ketë takime me kryeministrin Rama dhe kreun e opozitës, Lulzim Basha.
Vizita në Tiranë mbahet 3 javë para se Komisioni Europian (29 maj) të publikojë rekomandimin për negociatat me Shqipërinë.
Mogherini është në fund të mandatit të saj si shefe e diplomacisë europiane dhe ndoshta kjo është vizita e fundit në Tiranë në këtë funksion.
Vizita e Mogherinit në Tiranë përkon gjithashtu edhe me një krizë të fortë politike që po kalon vendi, ndërsa opozita ka dorëzuar mandatet e deputetëve, ndërsa ka paralajmëruar se nuk do të lejojë zhvillimin e zgjedhjeve lokale të 30 qershorit, që i konsideron një process farsë.
Nuk dihet sesa fuqi mund të ketë shefja e Diplomacisë së BE-së për të ndikuar në zgjidhjen e krizës politike, por ajo është shfaqur disa herë në krah të kryeministrit Edi Rama, të cilin e ka mbështetur edhe gjatë krizës së 2017, kur opozita protestonte në çadër.
