Historia ime në Partinë Demokratike është një kapitull i mbyllur, nëse më gjeni sot që unë të kem folur qoftë edhe 1 sekondë pro qeverisë atëherë ma nxirrni.
Kështu tha mbrëmjen e sotme në Opinion, Astrit Patozi, ish-deputet dhe ish-nënkryetar i PD-së për mbi 8 vjet.
Duke folur për raportet me Rudina Hajdarin, Patozi tha se ka folur dhe ka diskutuar, duke shtuar se kësaj qeverie që është shumë e keqe, nuk mund ta konkurosh duke u larguar.
“Bindja Demokratike është shtëpia e lirisë, çdo njeri që e ndjen veten kundër qeverisë dhe të djathtë është i mirëpritur të vijë.
Ky nuk është një projekti i imi personal. Rudina Hajdari është një lloj talenti politike, që merr qëndrime dhe vendime të duhura.
Me zonjën Hajdari kam biseduar edhe për këtë projekt, dhe ajo ka thënë në Kuvend se opozita duhet të marrë pjesë në zgjedhje.
Ne jemi një pjesë e opozitës. Ne mendojmë se shqiptarët e zemëruar me këto lloj dinosaurësh, që po e çojnë vendin në përplasje civile, duan një tjetër alternativë dhe ne ja ku jemi.
Unë jam një projekt i ri. Kam një keqardhje për PD që është katandisur në këtë nivel, por unë kam humbur çdo lloj aspekti me këtë parti.
Unë kam shumë miq në PD, më vjen keq për shtëpinë e dikurshme politike, por nuk kam asnjë faj për atë që ka ndodhur”, tha Patozi.
I pyetur lidhur me bashkëpunimin me Edi Ramën, Patozi tha se janë dy momente.
“Momenti i parë, është tavolina politike e 2012 kur të pranishëm kanë qenë Edi Rama, Sali Berisha, Ilir Meta, Gramoz Ruçi, Shpëtim Idrizi dhe unë.
Momenti i dytë është ai kur para disa ditësh, shkova të bëja check ap dhe nëse ky mund të konsiderohet si bashkëpunim me Edi Ramën nuk e di”, tha Patozi.
Në vijim ai shtoi se nëse do të ishte aleat i Ramës, atëherë do e deklaronte një gjë të tillë, dhe askush nuk do të kishte guxim t’i thonte gjë.
